(ភ្នំពេញ)៖ ថ្ងៃទី២០ ខែមេសា ឆ្នាំ២០២០នេះ លោក ហេង សួរ អ្នកនាំពាក្យក្រសួងការងារ និងក្រុមការងារ បានចុះត្រួតពិនិត្យមណ្ឌលចត្តាឡីស័កទាំង១០កន្លែង ដែលក្រសួងការងារ និងបណ្ដុះបណ្ដាលវិជ្ជាជីវៈ បានរៀបចំឡើង ដើម្បីដាក់បងប្អូនកម្មករនិយោជិតឱ្យ រស់នៅដាច់ដោយឡែក ១៤ថ្ងៃ ក្រោយគេត្រលប់ពីស្រុកកំណើត និងឈប់សម្រាកក្នុងឱកាសបុណ្យចូលឆ្នាំថ្មីកន្លងទៅនេះ ។

លោក ហេង សួរ បានឱ្យដឹងថា មណ្ឌលចត្តាឡីស័ក ឬហៅថាកន្លែងដាក់បងប្អូនកម្មករនិយោជិតឱ្យ រស់នៅដាច់ដោយឡែក ១៤ថ្ងៃ ទាំងនេះត្រូវបានបែងចែកជា ២កម្រិត ក្នុងនោះរួមមាន៖ ១.មណ្ឌលចត្តាឡីស័កកម្រិត១៖ ប្រៀបដូចជាការដាក់ខ្លួនឱ្យនៅដាច់ដោយឡែកពីគេក្នុងផ្ទះ ឬបន្ទប់ជួលផ្ទាល់ខ្លួន ប៉ុន្តែប្រសិនបើម្ចាស់បន្ទប់ជួលគាត់ ឬអ្នករួមបន្ទប់របស់គាត់មិនហ៊ានឱ្យនៅក្នុងបន្ទប់ជួលរបស់គេ ដូច្នេះសាមីខ្លួនអាចមកស្នាក់នៅដាច់ដោយឡែកនៅមណ្ឌលនេះបាន។ ២.មណ្ឌលចត្តាឡីស័កកម្រិត២៖ សម្រាប់ដាក់បុគ្គលដែលត្រូវបានគេយកសំណាកទៅត្រួតពិនិត្យនៅវិទ្យាស្ថានប៉ាស្ទ័រ ប្រសិនបើត្រួតពិនិត្យឃើញវិជ្ជមាន គេនឹងបញ្ជូនគាត់ទៅព្យាបាលនៅមន្ទីរពេទ្យមិត្តភាពខ្មែរ-រុស្ស៉ី។ មណ្ឌលចត្តាឡីស័កទាំង១០ទីតាំងនោះ មាននៅសួនឧស្សាហកម្មវឌ្ឍនៈ១ នៅសួនឧស្សាហកម្មកាណាឌីយ៉ា អនុវិទ្យាល័យគោកបញ្ជាន់ នៅសួនឧស្សាហកម្មវឌ្ឍនៈ២ នៅវិទ្យាល័យជម្ពូវ័ន្ត នៅអនុវិទ្យាល័យដង្កោ នៅវិទ្យាល័យភ្នំពេញថ្មី នៅតំបន់សេដ្ឋកិច្ចពិសេសភ្នំពេញ នៅសាលាបឋមសិក្សាភូមិឫស្សី និងនៅវិទ្យាល័យឫស្សីកែវ ។ លោកបានបញ្ជាក់ទៀតថា អគារចត្តាឡីស័កកម្រិត២ ក្នុង១បន្ទប់ស្នាក់នៅបានតែម្នាក់ប៉ុណ្ណោះ ចំណែកឯអគារចត្តាឡីស័កកម្រិត១ អាចស្នាក់បានលើសពីម្នាក់ ហើយក្នុងមណ្ឌលចត្តាឡីស័កកម្រិត១នីមួយៗ អាចដាក់មនុស្សសរុបបានប្រហែល ២,៥០០នាក់៕

លោក ហេង សួរ បានបន្តថា គិតមកដល់ពេលនេះ គេបានរកឃើញកម្មករចំនួន ២នាក់ ដែលចេញរោគសញ្ញាខ្លះៗ នៃរោគសញ្ញាជំងឺកូវីដ១៩ ហើយសំណាកពួកគេក៏ត្រូវបានទៅត្រួតពិនិត្យ នៅវិទ្យាស្ថានប៉ាស្ទ័រហើយ។ ប៉ុន្តែកន្លែងស្នាក់នៅរបស់ពួកគេនៅទីណានោះ លោក ហេង សួរ មិនអាចបញ្ជាក់បានឡើយ ដោយទុកជាការសម្ងាត់។ ពួកគេកំពុងទទួលបានការយកចិត្តទុកដាក់ពីអ្នកគ្រប់គ្រងមណ្ឌលចត្តាឡីស័ក ដោយមានកម្លាំងនគរបាលពិនិត្យមិនឱ្យគាត់ចេញដើរផ្ដេសផ្ដាសឡើយ និងមានការផ្ដល់ម្ហូបអាហារក្នុងកម្រិតអប្បបរមា។

គួរំលឹកថា នាឱកាសពិធីបុណ្យចូលឆ្នាំថ្មីកន្លងទៅនេះ មានកម្មករនិយោជិតក្នុងវិស័យវាយនភណ្ឌ កាត់ដេរ និងផលិតស្បែកជើង នៅទូទាំងប្រទេសប្រមាណ ៣០,០០០នាក់ ស្មើនឹង ២% បានឈប់សម្រាកទាំងមានច្បាប់ និងគ្មានច្បាប់អនុញ្ញាត ក្នុងនោះនៅរាជធានីភ្នំពេញមានប្រមាណ ១៥,០០០នាក់ ៕