ថ្មីៗនេះមហាជនអ្នកគាំទ្របានសម្ដែងការភ្ញាក់ផ្អើល បន្ទាប់ពីតារាចម្រៀងលោក យឿន សូតអនុស្សវរីយ៍ ប្រកាសនៅលើបណ្ដាញសង្គមផ្លូវការរបស់ខ្លួនថា លោកបានបញ្ចប់កុងត្រាជាមួយផលិតកម្ម សាន់ដេ ដែលជាទ្រនំធ្លាប់ជ្រកសាងភាពល្បីល្បាញក្នុងវិស័យសិល្បៈរយៈពេលជាច្រើនឆ្នាំមកនេះ ។
តារាចម្រៀង លោក យឿន សូតអនុស្សវរីយ៍ បានលើកឡើងកថា ពេលនេះលោកបានបញ្ជាប់កុងត្រា ជាមួយផលិតកម្មសាន់ដេ ជាផ្លូវការហើយ ។ លោកអរគុណពេលជាច្រើនឆ្នាំដែលបានរួមរស់ក្រោមដំបូលផលិតកម្មធំមួយនេះ ហើយលោកពិតជាទទួលបានភាពកក់ក្តៅ និងការជួយជ្រោមជ្រែងជាច្រើនរាប់មិនអស់ពីក្រុមហ៊ុនមួយនេះ ។ បើទោះជាយ៉ាងណាលោកថា គ្មានការជួបជុំណាដែលមិនបែកគ្នានោះទេ ប៉ុន្តែអនុស្សាវរីយ៍ល្អៗជាច្រើននៅតែដក់ជាប់ក្នុងក្រអៅបេះដូងរបស់លោកជានិច្ចនិរន្តរ៍។
ម្ចាស់បទ «ដាក់កំប៉ុងពីរកំប៉ុង» លោក យឿន សូតអនុស្សវរីយ៍ បាននិយាយថា «ខ្ញុំបាទ យឿន សូតអនុស្សាវរីយ៍ សូមប្រកាសជាសាធារណៈថា ខ្ញុំបាទបានបញ្ចប់កុងត្រាការងារជាមួយផលិតកម្ម សាន់ដេ (SUNDAY PRODUCTION) ជាផ្លូវការហើយ ។ ក្នុងរយៈពេលជាច្រើនឆ្នាំដែលខ្ញុំបាទបានរួមរស់ក្រោមដំបូលសាន់ដេពិតជាទទួលបានភាពកក់ក្តៅ និងការជួយជ្រោមជ្រែងជាច្រើនរាប់មិនអស់ ខ្ញុំបាទមានថ្ងៃនេះគឺជាគុណបំណាច់ដ៏ធំធេងមិនអាចថ្លៃបានរបស់គ្រួសារសាន់ដេ ពេលវេលាកន្លងមកធ្វើឱ្យខ្ញុំបាទចងចាំមិនអាចបំភ្លេចបានក្នុងមួយជីវិតនេះ» ។
លោកបន្តថា «គ្មានការជួបជុំណាដែលមិនបែកគ្នានោះទេ ប៉ុន្តែអនុស្សាវរីយ៍ល្អៗជាច្រើនរាប់មិនអស់បានដក់ជាប់ក្នុងក្រអៅបេះដូងខ្ញុំជានិច្ចនិរន្តរ៍ ។ ជាចុងក្រោយក៏សូមអរគុណពុកម៉ែបងប្អូនទាំងអស់ដែលបានគាំទ្រខ្ញុំបាទតាំងពីដើមរហូតដល់បច្ចុប្បន្ន។ សូមទទួលនូវការគោរពរាប់អានដ៏ជ្រាលជ្រៅអំពីខ្ញុំ អនុស្សាវរីយ៍» ។
យ៉ាងណាការប្រកាសដើរចេញផលិតកម្មខាងលើនេះលោក អនុស្សវរីយ៍ មិនបានបញ្ជាក់ពីមូលហេតុឡើយ ហើយក៏បានមិនបានបញ្ជាក់ថាលោកនឹងទៅចូលរួមជាមួយផលិតកម្មណានោះដែរ ។ ប៉ុន្តែបើតាមប្រភពព័ត៌មានល្ហិចល្ហៀងកន្លងមកថា តារាចម្រៀងដែលមានសំឡេងខ្ពស់រូបនេះអាចនឹងចូលជ្រកក្រោមទ្រនំផលិតកម្មធំមួយទៀតតាមជាអ្នកនិពន្ធ ដែលធ្លាប់ជួយជ្រោមជ្រែង និងដុសខាត់សមត្ថភាពរបស់លោកឱ្យកាន់តែមានកេរ្ដិ៍ឈ្មោះ នៅទ្រនំចាស់ ។
បើទោះជាយ៉ាងណាពាក់ព័ន្ធនឹងការប្រកាសបញ្ចប់កុងត្រាជាមួយសាន់ដេ ព្រមទាំងដំណឹងខាងនេះ អនុស្សាវរីយ៍ បានឆ្លើយប្រាប់ តារាញូស៍ យ៉ាងខ្លីថា លោកសុំមិននិយាយអ្វីទាំងអស់ គឺសុំរក្សាភាពស្ងៀមស្ងាត់សិន ។ ឆ្លើយតបតាមរយៈបណ្ដាញសង្គមតេឡេក្រាមជាមួយលោក ម៉ៅ វិបុល តារាញូស៍ យឿន សូត្រអនុស្សាវរីយ៍ បាននិយាយយ៉ាងដូច្នេះថា «ប្អូនសុំអត់និយាយអីទាំងអស់ ពេលនេះខ្ញុំសុំស្ងៀមស្ងាត់សិន អរគុណ សូមអធ្យាស្រ័យផងបង» ។
សូមបញ្ជាក់ថា លោក យឿន សូតអនុស្សវរីយ៍ ជាតារាចម្រៀងម្នាក់ដែលជាអតីតបេក្ខភាពចូលរួមប្រឡងចម្រៀងកម្មវិធី ពេជ្យកំពុងច្នៃ របស់ស្ថាននីយ៍ទូរទស្សន៍អាស៊ីអាគ្នេយ៍ ។ ក្រោយមកម្ចាស់បទ «ស្រមោច» ក៏ទទួលបានឱកាសចូលរួមរស់ជាមួយផលិតកម្មសាន់ដេដោយមានការជ្រោមជ្រែងពីអ្នកនិពន្ធគឺ សុន រដ្ឋា រហូតក្លាយជាតារាចម្រៀងម្នាក់ដែលមានភាពល្បីល្បាញមកដល់បច្ចុប្បន្ន ៕
