តូតា បកស្រាយ​រឿង​បន្ទប់​គេង​មាន​ផ្កា​កុលាប​ដូច​រាត្រី​ទឹកឃ្មុំ

0
787

ភ្នំពេញ: ទើប​តែ​ច្រាន​ចោល​ពីមន្ទិល​សង្ស័យ​មហាជន​រឿង​មាន​អ្នកជូន​កាដូ​គ្រឿង​អលង្ការ​ខ្សែដៃ​តម្លៃ​ក្បែរ​ខ្ទង់​ពាន់​ដុល្លារ​មុននេះ​សោះ ឥឡូវ​ស្រាប់តែ​ឃើញ​តារា​សម្តែង​ស្រី​មាន​រាង​តូច​ច្រឡឹង បបូរ​មាត់​សិចស៊ី​កញ្ញា ម៉ាក់ សែន​សូនីតា បន្ថែម​ចម្ងល់​ដ៏ចម្លែក​មួយ​ទៀត​គឺ​បង្ហាញ​ទិដ្ឋភាព​បន្ទប់​ដេក​ផ្ទាល់ខ្លួន​នាង​មានការ​តុបតែង​ផ្កា​កុលាប​ក្រហម​លើ​គ្រែ​ពូក​ប្រណីត និង​ក្នុង​បន្ទប់​គេង​ដូចជា​មាន​គូស្នេហ៍ រៀបចំ​ភាព​ផ្អែម​ល្ហែម​នៅ​ក្នុង​ថ្ងៃ​ពិសេស​របស់​ខ្លួន​អ៊ីចឹង។

តែ​តារា​ស្រី និង​ពិធី​ការិនី​ទូរទស្សន៍ ទើប​តែ​បង្កការ​ភ្ញាក់ផ្អើល​រឿង​ដូរ​រថយន្ត​ថ្មី​ពីឃ្លាំង ម៉ាក​ឡិចស៊ីស​ស៊េរី 450d តម្លៃ​ជាង ១៧ ម៉ឺន​ដុល្លារ កាល​ដើម​ឆ្នាំ ២០១៧ ផ្អើល​ទាំង​មហាជន និង​មិត្ត​អ្នកសិល្បៈ​បើក​ភ្នែក​ធំៗ កញ្ញា តូតា បន្ត​បកស្រាយ​ផ្ទុយ​នឹងការ​សង្ស័យ​របស់​មហាជន​ម្តង​ទៀត​ថា៖ «អត់​ទេបង! គ្មាន​អ្នក​ពិសេស​ណា​រៀបចំ​ឲ្យ​នោះ​ទេ!ការរៀប​ចំនេះ តាម​ពិត​ទៅ​មាន​ក្រុម​មិត្តភក្តិ​ស្និទ្ធស្នាល​ខ្ញុំ គាត់​បាន​សុំការ​អនុញ្ញាត​ពី​ប៉ាម៉ាក់​ខ្ញុំ​ជាមុន​រៀបចំ​ដើម្បី​ពញ្ញាក់​អារម្មណ៍ ឬធ្វើ​ខ្ញុំ​ភ្ញាក់ផ្អើល​ប៉ុណ្ណោះ​ព្រោះ​ពួកគាត់​ចង់​ឲ្យខ្ញុំ​សប្បាយចិត្ត ក្រោយ​ពីបាន​ដឹង​ថា ខ្ញុំ​រវល់​ការងារ​ច្រើន​ពេក​នោះ​នា​រយៈពេល​ថ្មីៗ​នេះ និង​ជាការ​ប៉ះប៉ូវ​នូវ​សេចក្តី​ដឹងគុណ​ចំពោះ​ការជួយ​ឲ្យ​កិច្ចការ​ពួកគេ​កន្លង​មក​ផងដែរ»។

មើល​ទៅ​ដំណឹង​ថា បុរសៗ​ទាំង​ចាស់​ទាំង​ក្មេង ៤ ឬ ៥ នាក់ កំពុងតែ​ប្រជែង​គ្នា​ដើម្បី​ដាក់​ពាក្យសុំ​ធ្វើ​ជាម្ចាស់​ឃុំគ្រង​បេះដូង តាមរយៈ​ការ​ឧស្សាហ៍​ឃើញ មាន​ការ​ជូន​កាដូ​នេះ​កាដូ​នោះ​ប្លែកៗ​ដូចជា ចិញ្ចៀន​ពេជ្រ​ម៉ាក​ល្បី Tiffany & Co និង​គ្រឿង​អលង្ការ​ខ្សែដៃ​ល្បី​ម៉ាក Kayve ជាដើម​នោះ នៅតែ​បន្តការ​តាម​ដាន និង​សង្ស័យ​តទៅ​ទៀត​សិន​ហើយ​មើល​ទៅ​ព្រោះ​កញ្ញា តូ​តា នៅតែ​មិនទាន់​សារភាព​ថា​មាន​ម្ចាស់​ចិត្ត​ជូន​កាដូ​ទាំង​នោះ​នៅ​ឡើយ។

តូតា ប្រកែក​នាពេល​សួរ​បញ្ជាក់​ថា តើ​អូន​មាន​គូស្នេហ៍​រៀបចំ​បន្ទប់​មាន​ផ្កា​កុលាប​នេះ​ទេ​ដឹង? កញ្ញា​តប​ថា៖ «អត់​ទាន់​មាន​ទេបង ទោះបី​ជាមាន​អ្នក​តាម​ស្រឡាញ់​ច្រើន​យ៉ាងណា​ក្តី តែ​ដូចជា​ធ្លាប់​ជម្រាប​ជូន​ពីមុន​អ៊ីចឹង​នៅ​ពុំមាន​អ្នក​ពេញចិត្ត ហើយ​បើ​ទោះបី​ជា នាង​ខ្ញុំ​មានគេ​ជូន​កាដូ​ពី អ្នក​តាម​ស្រឡាញ់​កន្លង​មក​នោះ កាដូ​ខ្ញុំអត់​ដែល​ទទួល​ទុក​ផង ព្រោះ​មិន​ចូលចិត្ត ហើយក៏​ឲ្យទៅ​ម៉ាក់​វិញ​ក៏មាន​ដែរ»។

ដូចជា​ករណី​ការ​បង្ហោះ​រូប​ខ្សែដៃ​មាន​តម្លៃ​ប្រមាណ​ជិត​មួយ​ពាន់ដុល្លារ​រហូត​ធ្វើ​ឲ្យ​មហាជន​កើតការ​សង្ស័យ​ថា កាដូ​នោះ​ទំនង​ជា​កាដូ​ភ្ជាប់​និស្ស័យ​ស្នេហ៍​ថ្មី​ហើយ តែ​កញ្ញា ម៉ាក់ សែន​សូនីតា បកស្រាយ​ថា៖ «គ្មាន​អ្នកណា​គេ​ទិញ​ឲ្យ ឬជូន​កាដូ​នាង​ខ្ញុំ​នោះ​ទេ។ តាម​ពិតទៅ​គឺវា​ជា​គ្រឿង​អលង្ការ​ខ្សែដៃ ប្រភេទ​កាឡៃ តែមាន​ម៉ាក​ល្បី ដែល​នាងខ្ញុំ​បាន​កុម្ម៉ង់​ទិញ​ពី​អឺរ៉ុប​មក ម៉ាក Kayve សម្រាប់​ពាក់​ចូល​កម្មវិធី​សិល្បៈ ឬពេល​សម្តែង​នានា​តែ​ប៉ុណ្ណោះ»៕

Comments