ភ្នំពេញ​៖នៅ​រសៀល​ថ្ងៃទី៦ខែវិច្ឆិកានេះ អ្នកស្រី ឡុច សុធី ជាកូនស្រីវីរៈសិល្បការិនីជើង​ចាស់ យាយ ចាន់ ស៊ីផាន់ ដែល​កំពុង​មាន​ជំងឺជាទម្ងន់​ក្នុងវ័យ​ជិតមួយ១០០ឆ្នាំនោះ បាន​បញ្ជាក់​ឲ្យ​ដឹងថា «ម្ដាយ​របស់​អ្នក​ស្រី​​មាន​វ័យ​៩៣ឆ្នាំ ហើយ​បាន​​ធ្លាក់​ខ្លួន​ឈឺ​ជាង​២ឆ្នាំ​មក​ហើយ ប៉ុន្តែ​ទើប​ធ្លាក់​ខ្លួន​ឈឺ​ខ្លាំង​រហូត​ដល់​ងើប​ពី​កន្ទេល មិន​រួច​ប្រហែល​១សប្ដាហ៍​មក​នេះ ដោយ​ក្នុង​នោះ​២ថ្ងៃ​ចុង​ក្រោយ​នេះ ហូប​​អ្វី​ក៏​មិន​កើត​ដែរ។

កាលពីថ្ងៃ​ទី​៥ខែវិច្ឆិកា ជាមួយ​ការបង្ហាញ​នៅ​ក្នុង​បណ្តាញសង្គមថា យាយ ចាន់ ស៊ីផាន់ វីរៈ​សិល្បការិនីសម្តែង​ល្បី​នាទស្សវត្សឆ្នាំ៨០ជាង កំពុងមានជំងឺជាទម្ងន់ដេកឈឺនៅ​និង​កន្ទេល​ ក៏​បង្ហាញឲ្យ​ដឹងផងថា ក្នុងវ័យ​ដ៏​ជរា​៩៣​ឆ្នាំ ឈឺដេកដួលនោះ យាយ ចាន់ ស៊ីផាន់ ក៏​មាន​ក្តី​នឹក​រលឹកដល់​តារាសិល្បៈ​ធ្លាប់​ហែលឆ្លង​ថ្នាក់​សិល្បៈ​សម្តែងជាមួយគ្នា មានលោក ខៃ ប្រសិដ្ឋ អ្នកស្រី ចាន់ តារ៉ាទី លោក ទេព រិន្ទដារ៉ាជាដើម ។ ដោយ​យាយថា មុនផុតដង្ហើម​ទៅ បាន​ជួបមិត្តភក្កិចាស់ៗធ្លាប់សម្តែងភាពយន្ត​កម្សត់​កម្រនឹងគ្នានោះ អស់​ចិត្តហើយ​។

តែ​យ៉ាងណា វាចារទន្ទឹងរបស់​យាយ ចាន់ ស៊ីផាន់ ចំពោះមិត្តភក្កិចាស់​ៗក្នុងថ្នាលសិល្បៈ លុះ​រំលង​វេលាមួយ​យប់​មួយ​ថ្ងៃហើយ នៅ​មិន​ទាន់​ត្រូវ​បាន​បង្ហាញឲ្យ​ដឹង​ថា មាន​វត្តមាន​សិល្បករ សិល្បការិនី ចាស់ៗរួម​ជំនាន់ ទាំងអ្នក​មាន​ឈ្មោះ​ក្នុង​សំដី​ចង់​ចាំរបស់​ យាយ ស៊ីផាន់ បង្ហាញ​ខ្លួនសួរសុខទុក្ខនោះ​ទេ ក្រៅពីប្រធានសមាគ​សិល្បករខ្មែរ ដែលជាអ្នក​សិល្បៈជំនាន់ក្រោយ​ដឹកនាំ សិល្បករសិល្បការិនី បួនដប់នាក់ ដែលមាន​ឈ្មោះ ក្នុង​សំដី​ដង្ហើយរបស់ យាយ ចាន់ ស៊ីផាន់ ទៅសួរសុខទុក្ខ​និងជួន​អំណោយមូលនិធិសិល្បៈចាស់​ជរា ពីសមាគ​ម​មិត្តសិល្បៈស្មគ្រចិត្តដើម្បីជួយសង្គម​។

ក្រៅពីការទន្ទឹងរបស់ម្តាយ​នោះ កូន​ស្រី​អ្នក​សិល្បៈ​ជើង​ចាស់​ខាង​លើអ្នក​ស្រី ឡុច សុធី ​​បានលើកឡើងថា «ដោយម្តាយអ្នកស្រីមាន​​វ័យ​រហូត​ដល់​៩៣ឆ្នាំ ​ហើយ​​មាន​គ្រូពេទ្យ​​ជា​ប្រ​ចាំ​​ផង មិន​មាន​គម្រោង​បញ្ជូន​ម្ដាយ​របស់​ខ្លួន​ទៅ​ព្យាបាល​នៅ មន្ទីរពេទ្យ​ឡើយ គឺ​ក្រុម​គ្រួសារ​​ស្រេច​ព្យាបាល​នៅ​ក្នុង​ផ្ទះ និង ធ្វើ​ពិធី​តាម​បែប​សាសនា ប៉ុណ្ណោះ ។

អ្នក​ស្រី ឡុច សុធី ដែលបង្ហាញពីជំហ៊​ ​មិន​បាន​ស្នើ​​សុំ​ជំនួយ​ពី​អ្នក​សិល្បៈ​ឬ សប្បុរសជន​ណា​មួយ យក​​ប្រាក់​មក​ព្យាបាល​ជំងឺម្តាយ​ ប៉ុន្តែ​អ្នក​ស្រី​ចង់​បាន បំពេញ​បំណង​ម្ដាយ​របស់​ខ្លួន​ដែល​ចង់​ឃើញ​​មុខ​អ្នក​សិល្បៈ​រួម​ជំនាន់ ដូច​ជា នាយ​កុយ នាយ​ក្រឹម និង​អ្នក​សិល្បៈ​ជា​ច្រើន​ទៀត ដែល​ធ្លាប់​មាន​អនុស្សាវរីយ៍​ជា​មួយ​គាត់​តែ​ប៉ុណ្ណោះ។

គួរបញ្ជាក់ថា តារា​សម្ដែង​ជើង​ចាស់ ចាន់ ស៊ីផាន់ បាន​ប្រើ​ពេល​ស្ទើរ​មួយ​ជីវិត​របស់​គាត់ ប្រលូក​លើ​វិថី​សិល្បៈ​នេះ ទាំង​តារា​សម្ដែង គ្រូ​បង្ហាត់​សិល្បៈ​ស្ទើរ​គ្រប់​ទម្រង់ ដូច​ជា ល្ខោន យីកេ របាំ​ជា​ដើម ។ អ្នក​ស្រី​មាន​កូន​តែ​២នាក់​ប៉ុណ្ណោះ ប្រុស​១ស្រី១ ផ្ទះ​របស់​អ្នក​ស្រី ចាន់ ស៊ីផាន់ ស្ថិត​នៅ ខាង​ក្រោយ​ទូត​ចិន ក្នុង​សង្កាត់​ទូល​ទំពូង២។