វៀតណាម៖ តារាចម្រៀងសំឡេងក្រអួនក្រអៅ មាស សុខសោភា បានធ្វើឲ្យមហាជន​ទូទៅមាន​ការ​ភ្ញាក់ផ្អើលយ៉ាងខ្លាំង ខណៈនារាត្រីថ្ងៃទី២២ វិច្ឆិកា តារាចម្រៀងរូបនេះ បានបង្ហើរសំនៀង​នៅលើ​ឆាកតន្ត្រីនៃពិធីមង្គលការនៅខេត្តត្រាវិញ ប្រទេសវៀតណាម ។ រំពេចនោះ តារាចម្រៀង​ស្រីដ៏ល្បី មាស សុខសោភា បានសារលើគណនីអ៊ីនស្ត្រាក្រាមថា “សប្បាយណាស់! នេះជាលើក​ដំបូងសម្រាប់នាងខ្ញុំ បានមកទីនេះ” ។ ទន្ទឹមនោះ តារាចម្រៀងរូបនេះ ក៏បានង្ហោះវីដេអូជិត ១នាទី ស្តែងពី​សកម្មភាពនាង ច្រៀងបទ “ភព្វសំណាង” យ៉ាងពិរោះរណ្តំ ធ្វើឲ្យអ្នកទស្សនាជាជន​ជាតិវៀតណាមមានការសប្បាយរីករាយផងដែរ ។

គួរបញ្ជាក់ថា វត្តមានតារាចម្រៀងផ្សាភ្ជាប់ជីវិត​នឹងធម្មជាតិ មាស សុខសោភា ច្រៀងលើឆាកយ៉ាងពិរោះនោះ គឺតបការអញ្ជើញពីសំណាក់​ពិធីករ​វៀតណាមភ្លាមៗ ខណៈនាងកំពុងអង្គុយញ៉ាំភោជនីអាហារក្នុងពិធីមង្គលការនៅវៀតណាម ។ ជុំវិញរឿងនេះ មានអ្នកជិតស្និទ្ធនឹងតារាចម្រៀង មាស សុខសោភា បានបង្ហើបឲ្យដឹងថា “តារា​រូបនេះ បានចាកចេញពីកម្ពុជាទៅចូលរួមពិធីមង្គការបងប្អូននៅវៀតណាម តាំងពីថ្ងៃទី២០ វិច្ឆិកា មកម៉្លេះ” ។ ការបង្ហាញ​វត្តមានលើកដំបូងរបស់តារាចម្រៀង មាស សុខសោភា ត្រូវបានអ្នកគាំទ្រនាងនៅវៀតណាម ទទូចសុំឲ្យនាងមកច្រៀងមកម្តងទៀត បើមានឱកាស ៕