លោក ព្រឿង រតនា អគ្គនាយកក្រុមហ៊ុន BREM Production និង BREM Media ត្រូវបាន​តែងតាំងជា «ទីប្រឹក្សាផ្ទាល់» សម្ដេចព្រះមហាសង្ឃរាជ បួរ គ្រី និងបញ្ញត្តិគោរម្យ៍ងារជា «ធម្មរតន៍នាថសរណគមន៍មហាឧបាសកពុទ្ធសាសនូបត្ថម្ភក៍» ។

ពិធីប្រកាសតែងតាំងនេះត្រូវបានប្រារព្ធឡើងកាលពីព្រឹកថ្ងៃទី៣០ ខែឧសភា ឆ្នាំ២០២២ នៅវត្តបទុមធម្មយុត្តិ ក្រោមព្រះរាជវត្តមានផ្ទាល់ សម្ដេចព្រះអភិសិរីសុគន្ធាមហា​សង្ឃរាជា​ធិបតី កិត្តិឧទ្ទេសបណ្ឌិត បួរ គ្រី សម្តេចព្រះមហាសង្ឃរាជ នៃគណៈធម្មយុត្តិកនិកាយ នៃ​ព្រះរាជាណាចក្រកម្ពុជា និងជាព្រះប្រធានគណៈសង្ឃនាយក នៃគណៈធម្មយុត្តិ​កនិកាយ នៃព្រះរាជាណាចក្រកម្ពុជា ។

លោក ព្រឿង រតនា បានសាងព្រះផ្នួស និងអាស្រ័យក្នុងវិស័យពុទ្ធចក្រចំនួន១០ព្រះវស្សា ជាមួយស្នាដៃ និងការងារជាច្រើនទាំងពុទ្ធចក្រ និងអាណាចក្រ ។ កាលគង់ក្នុងព្រះផ្នួស​ក្រៅពីស្វាធ្យាយនូវព្រះធម៌ វិន័យ និងការសិក្សាយ៉ាងពូកែគួរជាទីគោរពស្រឡាញ់​ពីពុទ្ធ​បរិស័ទ និងព្រះសង្ឃដូចគ្នា លោកជាតំណាងចូលរួមកិច្ចប្រជុំធំៗកំពូលលំដាប់ថ្នាក់​អន្តរ​ជាតិ​នៅតាមបណ្ដាប្រទេសនានាកាន់ព្រះពុទ្ធសាសនាដង្ហែជាមួយសម្ដេច​សង្ឃរាជ​ជា​ច្រើនលើកផងដែរ ។

លោកបានចូលរួមក្នុងពិធីបំបួសកុលបុត្រចំនួន៥០០អង្គទាំងនៅរាជធានីភ្នំពេញ និង​ខេត្ត​ក្រចេះដែលជាទឹកដីកំណើត ។ លោកក៏ជាអ្នកអនុវត្ត និងដឹកនាំសម្ភារក្នុងការសាងសង់​សាលាពុទ្ធិកសិក្សា ជា ឆោម នៅខេត្តក្រចេះ ។ ក្រោយលាចាកសិក្ខាបទនៅឆ្នាំ២០០៨ លោក ព្រឿង រតនា បានប្រឡូកក្នុងវិស័យប្រព័ន្ធផ្សព្វផ្សាយ​ក្នុងតួនាទីជាអ្នកបច្ចេក​ទេស​ថត កាត់ត និងផលិតករកម្មវិធីយ៉ាងចំណាន ។ បទពិសោធការងារទាំងនេះបានធ្វើឱ្យរូប​លោកក្លាយជាអ្នកឯកទេសផ្នែកបច្ចេកទេសដ៏ប៉ិនប្រសព្វលើវិស័យនេះផងដែរ ។

ដោយសារសេចក្ដីព្យាយាម ការខិតខំប្រឹងប្រែងក្រេបជញ្ជក់ និងបង្កើនចំណេះដឹង តាំងពី​នៅជាព្រះសង្ឃ និងក្នុងកិច្ចការងារជាគ្រហស្ថ លោកក៏បានបង្កើតក្រុមហ៊ុន BREM Production ផ្ទាល់ខ្លួន ដោយទទួលបានការបង្វឹកដោយផ្ទាល់ពីអ្នកជំនាញ​អន្តរជាតិ​ថែម​ទៀតផង ។ ក្រុមហ៊ុនរបស់លោកមានបម្រើសេវាកម្មថតផ្សាយផ្ទាល់គ្រប់កម្មវិធី ថតវីដេអូ ថតស្ប៉ត ថតរូបភាព Live Stream លើសពីថតកម្មវិធី ក៏មានការផ្សាយផ្ទាល់លើ​ព្រឹត្តិការណ៍ប្រគុំតន្រ្តី ចូលទៅកាន់ប្រព័ន្ធផ្សព្វផ្សាយសង្គម ផ្សាយផ្ទាល់កម្មវិធីអង្គប្រជុំធំៗ ដូចជា ក្រសួងពាណិជ្ជកម្ម សមាគមគ្រូពេទ្យ គណមេធាវី ជាដើម ខណៈចុងក្រោយនេះ​ក្រុមហ៊ុនក៏អាចផ្សព្វផ្សាយបានជាមួយ Platform ទំនើបនឹងពេញនិយមក្នុងមុខងាររបស់​ឌីជីថតថែមទៀតផង ។ បន្ទាប់ពីឈរជើងប្រឡូកក្នុងទីផ្សារកម្ពុជាផ្នែកប្រព័ន្ធផ្សព្វផ្សាយ លោកទទួល​បាន​ជោគ​ជ័យជាបន្តបន្ទាប់ជាហេតុបណ្តាឲ្យសភាពាណិជ្ជកម្មកម្ពុជា សម្រេចបញ្ចូលលោក ព្រឿង រតនា ជាសមាជិកបន្ថែមរបស់ខ្លួនក្នុងឆ្នាំ២០២២។ ហើយលោកក៏ជាសមាជិករបស់ស្ថាប័ន BNI ផងដែរ ។