រថយន្ដសេរីទំនើបម៉ាក Lexus570 របស់លោក ករុណា ពេជ្រ ត្រូវបានក្មេងៗមួយ​ក្រុម​ជិះ​ម៉ូតូបុកបណ្ដាលឱ្យរងការខូចខាតយ៉ាងដំណំ ។ នេះ​បើយោងការបង្ហោះឱ្យដឹងពីតារា​ចម្រៀងប្រចាំផលិតកម្មថោនរូបនេះ ។

ដោយនៅលើទំព័ហ្វេសប៊ុកផ្លូវការរបស់ខ្លួន ករុណា ពេជ្រ បានបញ្ជាក់ថា នៅ​វេលា​ម៉ោង​៨យប់ ខណៈដែលខ្លួនចេញពីពិធីបុណ្យគម្រប់ខួបមួយឆ្នាំរបស់អ្នក​ស្គាល់នៅស្រុក​កៀន​ស្វាយ ស្រាប់​តែ​មកដល់ចំណុចទីប្រជុំជន​មួយកន្លែងលើដងផ្លូវហាន់ណូយ មាន​ក្មេងៗ​៣នាក់បានជិះម៉ូតូឌុប​គ្នាយ៉ាងលឿនបុកចំឡានផ្នែកចំហៀង បណ្ដាល​ឱ្យរងការ​ខូចខាត​យ៉ាងដំណំ ។ បើទោះជា​យ៉ាងណាគ្រោះថ្នាក់ដោយចៃដន្យនេះ​មិនបានបង្កជារបួស​ស្នាម​ធ្ងន់ធ្ងរអ្វីឡើយ ។

ថ្លែង​ជាសារសំឡេងជាមួយ តារាញូស៍លោក ករុណា ពេជ្រ បានអះអាងថា សំណាង​ណាស់ដែលមិនមានអ្នកប៉ះពាល់ដល់ជីវិត ប៉ុន្តែចំពោះលោកទៅវិញទេ​ដែលជា​អ្នកធ្ងន់ធ្ងរ នោះគឺត្រូវចំណាយថ្លៃជុសជុលរថយន្ដឡើងវិញខ្ទង់រាប់ពាន់ដុល្លារ ។ លោកថា រថយន្ដ​ម៉ាក Lexus570 របស់ខ្លួននេះ គឺត្រូវជុសជុលឡើងវិញជាច្រើន​កន្លែងដូចជាចង្កៀង​មុខ និង​បដា​ផ្សេងៗដែលគិតការចំណាយសរុបអាចប្រហែលខ្ទង់ជាង ៣,០០០ ដុល្លារ ។

បើទោះជាយ៉ាងណាលោក ករុណា ពេជ្រ សង្កត់ធ្ងន់ថា លុយ ឬឡានលោក​អាចមាន​លទ្ធ​ផលជុសជុល ឬទិញថ្មីវិញបាន ប៉ុន្តែប្រសិនបើគ្រោះថ្នាក់ធ្ងន់ធ្ងរដល់អាយុជីវិត ឬ​យ៉ាង​ណា​នោះ គឹប្រាកដជាស្ដាយក្រោយហើយ ។ លោកបានសុំណូមពរដល់​អ្នកបើក​បរលើដងផ្លូវ​គ្រប់រូបឱ្យបង្កើនការប្រុងប្រយ័ត្នឱ្យបានខ្ពស់ ជៀសវាងជួបគ្រោះថ្នាក់ដោយប្រការ​ណា​មួយ និងប៉ះពាល់ដល់អាយុជីវិត និងមានវិបដិសារីយ៍នៅពេលក្រោយ ។

គួរបញ្ជាក់ថា ក្រៅពីតារាចម្រៀងលោក ករុណា ពេជ្រ តារាចម្រៀងប្រុស​ស្រី​ប្រចាំ​ផលិត​កម្មថោនពីរដួងទៀត ក៏បានជួបគ្រោះថ្នាក់ដូចជាករណីខាងលើនេះដែរ នោះគឺលោក ពេជ្រ ថាណា និងកញ្ញា រាប៊ី ផងដែរ ៕