នៅព្រឹកថ្ងៃទី១៥ ខែមិថុនា ឆ្នាំ២០២២នេះ តារាសម្ដែងស៊ិចស៊ីកញ្ញា មាន សូនីតា បាន​ប្រកាសដំណឹងដ៏ក្រៀមក្រំមួយ ក្រោយពីឪពុក​​ទទួលមរណភាព ។ ដំណឹង​នេះ​បានធ្វើ​ឱ្យ​មហាជន សិល្បករសិល្បការិនីជាច្រើនសម្ដែងការតក់ស្លុត និងសោក​ស្ដាយ​ជា​ខ្លាំង ។

ជាការពិត មាន សូនីតា ទើបតែទទួលអារម្មណ៍រីករាយកាលពីល្ងាចមិញ ពោលគឺនៅថ្ងៃ​សម្ភោធរឿងកុនដ៏ធំមួយដែលដឹកនាំដោយអ្នកស្រី ពាន់ ភួងបុប្ផា និងមានចូល​រួមសម្ដែង​ដោយរូបនាងផ្ទាល់ និងតារាសាច់ដុំលោក អេដវីន ។ ប៉ុន្តែរយៈពេលនៃការរីករាយ​រំលង​មិនបានប៉ុន្មានម៉ោងផង មាន សូនីតា ស្រាប់តែជួបទុក្ខដ៏ក្រៀមក្រំផុតក្នុងជីវិត ដោយឪពុក​របស់នាងបានទទួលមរណភាព ។

កន្លងមកតារាស្រីនិយម​ស្លៀក​ពាក់​​ខ្លី បញ្ចេញគល់ភ្លៅស្រឡូន ​និងសាច់​សខ្ចី​កញ្ញា មាន សូនីតា ធ្លាប់ទម្លាយថា នាងមិនសូវទទួលបានភាពកក់ក្ដៅពីឪពុក និងក្រុម​គ្រួសារ​ប៉ុន្មាន​ឡើយ ព្រោះឪពុកម្តាយ​របស់​នាងបានបែកបាក់គ្នាតាំងតែពីនាងនៅតូច ។ ប៉ុន្តែ​បើ​ទោះជា​យ៉ាងនៅឪពុកទទួលមរណភាព សូនីតា បានប្រកាសកាន់ទុក្ខ និងថែមទាំង​ភ្ជាប់នូវ​ខ្លឹម​សារយ៉ាងស្រងេះ​ស្រងោច​ ។ នាងបានសរសេរថា៖ «កូនសូម​បួងសួង​ដល់​វិញ្ញាណ​ក្ខ័ន្ធ​លោក​ពុក​បានទៅ​កាន់​សុគតិភព​កុំបី​ឃ្លៀងឃ្លាត​ឡើយ យ៉ាងណា​ក៏ជា​លោក​ឪពុក សូម​ពុកទៅឱ្យបានសុខ» ។

បើទោះជាយ៉ាងគ្មាននរណាដឹងថា ឪពុករបស់តារាស្រីរាងតូចច្រឡឹងរូបនេះ​ទទួលមរណ​ភាពដោយសារមូលហេតុអ្វីនោះឡើយ ប៉ុន្តែនៅគ្រាជួបទុក្ខធំនេះ មាន សូនីតា ទទួលបាន​ការលើកទឹកចិត្តជាច្រើនពីសំណាក់មហាជន ពិសេសសិល្បករ​សិល្បការិនីរួមអាជីព​ជា​ច្រើន​បាន​ចូលរួម​សម្ដែង​ការ​ស្ដាយ និងផ្ញើសាររំលែក​ទុក្ខយ៉ាង​ក្រៀមក្រំចំពោះ​ក្រុមគ្រួសារ​របស់នាង ។

ជាកត់សម្គាល់ មួយរយៈចុងក្រោយនេះនៅក្នុងចម្កោមអ្នកសិល្បៈហាក់មានតារាមួយ​ចំនួន​បានជួបនូវទុក្ខជាបន្តបន្ទាប់គ្នា ក្នុងនោះមានតារាចម្រៀងកញ្ញា សុវត្ថិឌី ធារីកា បាន​បាត់​បង់ឪពុកម្ដាយដោយមូលហេតុគ្រោះថ្នាក់ក្រឡាប់រថយន្ដនៅខេត្តព្រះវិហារ ការបាត់បង់​តា​រាសម្ដែង​កញ្ញា គង់ ម៉ូនីកា និងតារាសម្ដែង ឆៃលី ដាឡែន បានបាត់បង់បងប្រុស ហើយ​នៅថ្ងៃនេះក៏មានកញ្ញា មាន សូនីតា ផងដែរ ៕ អត្ថបទ៖ ម៉ោ វិបុល