ភ្នំពេញ៖ មហោស្រព​ភាពយន្ត​ជាតិ​លើក​ទី​៥​ បាន​ត្រលប់​មក​វិញ​ហើយ​ ជាមួយ​នឹង​​​ខ្សែ​ភាព​យន្ត​ខ្មែរ​ល្បី​ជាច្រើន​ មាន​ទាំង​ភាព​យន្ត​ដែល​បាន​ឈ្នះ​ពាន​ពី​បរទេស​ផង​ដែរ​ ​បាន​បើ​ក​ឲ្យ​ចូលរួម​ទស្សនា​ដោយ​សេរី​។ ក្នុងកម្មវិធីនោះ មានការចូលរួមគាំទ្រស្នាដៃខ្សែភាពយន្តខ្មែរ ពីសំណាក់តារាល្បីៗក្នុងប្រទេសកម្ពុជា ជាច្រើនដួង ។

គួរបញ្ជាក់ថា ចាប់ពី​ថ្ងៃ​​ទី​៦​ ដល់​ថ្ងៃ​ ទី​១០​ខែ​ធ្នូ​ ឆ្នាំ​២០១៧​ នេះ​​នឹង​មាន​ការ​ចាក់​ផ្សាយ​ឡើង​វិញ​នូវ​ភាព​យន្ត ខ្មែរ​ល្បី​ៗ ហើយ​​ អ្នក​ទាំង​អស់​គ្នា​អាច​រួម​ទស្សនា​ ភាព​យន្ត​ចំនួន​​៨​ រឿង ដោយ​សេរី​ នៅ​គ្រប់​រោង​ភាព​យន្ត​ រួមមាន រោង​ភាព​យន្ត​ Major Platinium Cineplex ផ្សារ Aeon, រោងភាពយន្ត Legend Cinema ផ្សារ​ទំនើប City Mall, រោងភាពយន្ត Prime Cineplex ផ្សារ​ទំនើប​សុវណ្ណា និង​រោង​ភាព​យន្ត​ទំនើប​នៅ​ក្នុង​រាជធានី​ភ្នំពេញ ។

ចំណែកឯភាពយន្តទាំង ៨នោះ រួមមាន ទី១ ​រឿង​ ទឹក​ចិត្ត​ម្តាយ​សម័យ​ថ្មី​, ទី២ រឿង ស៊ុបភើរមាំ, ទី៣ ​រឿង វិកលចរិត, ទី៤ រឿង តម្លៃ​ស្នេហ៍, ទី៥ រឿង មុន​ពេល​ដួល​រលំ, ទី៦ រឿង ការពារ​ឧក្រិដ្ឋ​ជន, ទី៧ ​រឿង អ្នកនាង​ម្ចាស់​​ឡឺ​កឺ, និង ទី៨ ​រឿង ខូចចិត្ត​អាជីព ៕