ភ្នំពេញ៖ ក្រោយរឿងរ៉ាវស្នេហា នីឡា និងគូដណ្តឹង រកាំរកូសរហូតដល់ត្រូវចែកផ្លូវគ្នា។ ព្រឹកមិញនេះ ឪពុក​បង្កើត នីឡា គឺលោក សុវណ្ណ រិទ្ធី ហៅតា វិចទ័រ បានបង្ហោះសារពាក់ព័ន្ធរឿងកូនចែកផ្លូវគ្នាថា «ចង្កៀងផ្ទះអ្នកណា ភ្លឺនៅផ្ទះអ្នកហ្នឹង» ។ ក្នុងន័យនេះ លោកតា វិចទ័រ ចង់សំដៅថា យើងមិនអាចមើលឃើញស្ថានភាពផ្ទៃក្នុងរបស់គ្រួសារគេទេ ហើយបើអ្នកមើលឃើញ ក៏ឃើញមិនច្បាស់ដែរ ។ នៅពីក្រោយ​រឿងនីមួយៗសុទ្ធតែមានហេតុនិងផល ហើយហេតុនោះទៀតសោត ពេលខ្លះអាចនិយាយបាន ខ្លះទៀតមិនអាចនិយាយបានឡើយ ។

ក្នុងសារដដែលនោះ លោកតា វិចទ័រ បានគូសបញ្ជាក់ថា «សុភមង្គល នៃគ្រួសារមួយ ប្រៀបដូច ជាពន្លឺ​ចង្កៀង​ប្រេង​កាត​អញ្ចឹង​ដែរ​ បើនៅផ្ទះណា ភ្លឺផ្ទះនោះ ហើយកាល​ណា​បើ​គ្មាន​ខ្យល់បក់ វាផ្តល់នូវពន្លឺខ្លាំង តែបើមានខ្យល់បក់ គឺវាមិនសូវភ្លឺទេ ជួនកាលក៏រលត់ ហើយងងឹតពេញផ្ទះ»។ ទន្ទឹមនោះ លោកតា វិចទ័រ សរបញ្ជាក់ឲ្យឃើញថា រឿងរ៉ាវចែកផ្លូវគ្នារបស់កូន នីឡា នៅ​មាន​អាទិ​កំបាំង​ជាច្រើន​ទៀត​នៅ​ពីក្រោយ ដោយ​លោកតា​មិន​អាច​និយាយ​បាន​ទេ ៕