ភ្នំពេញ៖ គ្រប់ទុក្ខលំបាករបស់បងប្អូនប្រជាពលរដ្ឋទូទាំងប្រទេសសុទ្ធតែត្រូវបានយកចិត្តទុកដាក់ពីសំណាក់កាកបាទក្រហម។ ជាក់ស្តែង​នៅថ្ងៃ​ទី ២៥ ខែធ្នូ​ ឆ្នាំ២០១៧ នេះ កាកបាទក្រហមកម្ពុជា ដែលមាន សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន បានឧបត្ថម្ភថវិកា និងគ្រឿងឧបភោគ-បរិភោគមួយចំនួន ជូនលោកយាយ​ យឹម​ សំអឿន​ អាយុ​ ៧៥ឆ្នាំ​ (ជាម្តាយបង្កើតរបស់​ លោក​ អ៊ិត សេដ្ឋា​)​ ដែលមានបន្ទុកត្រូវចិញ្ចឹមចៅកំព្រាទាំង​ ៣នាក់​ ក្នុងវ័យសិក្សា​ រស់នៅភូមិបឹងសាឡាង​ សង្កាត់ឬស្សីកែវ​ ខណ្ឌឬស្សីកែវ​ រាជធានីភ្នំពេញ។

ក្នុងឱកាសនោះ លោកជំទាវ ម៉ែន នារីសោភ័គ អគ្គលេខាធិការរងទី ១ កាកបាទក្រហមកម្ពុជា បានពាំនាំនូវប្រសាសន៍របស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលផ្តាំផ្ញើនូវការសួរសុខទុក្ខ​ និងក្តីអាណិតអាសូរចំពោះលោកយាយ​ និងចៅៗ​ ដែលរស់នៅក្នុងស្ថានភាពលំបាកបន្ទាប់ពីបាត់បង់លោក​ អ៊ិត​ សេដ្ឋា​ ដែលជាបង្គោលក្នុងគ្រួសារ។​ ជាមួយគ្នានេះ​ លោកជំទាវ​ បានជូនពរលោកយាយ​ មានសុខភាពល្អ​ អាយុយ៉ឺនយូរ​ ដើម្បីនៅជាម្លប់និងភាពកក់ក្តៅដល់ចៅៗ​ និងសូមផ្តាំផ្ញើដល់ចៅៗទាំង​ ៣នាក់​ ឱ្យខិតខំសិក្សារៀនសូត្រដើម្បីអនាគតភ្លឺស្វាង​ ហើយត្រូវកតញុតាចំពោះលោកយាយ​៕