ភ្នំពេញ៖ កាលពីប៉ុន្មានខែមុន តារាចម្រៀងម្ចាស់ពាន The Voice Cambodia រដូវកាលទី១ ប៊ុត សីហា បានបង្ហាញ​វត្តមាន​ម្តង​លើកញ្ចក់ទូរទស្សន៍ អ៊ីធីវី  ប៉ុន្តែក្រោយមកបានស្ងប់ស្ងាត់ទៅវិញ។ ស្រាប់តែពេលថ្មីៗនេះ ប្រទះឃើញ​តារា​ចម្រៀង​ដើមកំណើត​ខេត្តកំពង់ស្ពឺ ប៊ុត សីហា ធ្លាក់ខ្លួនមកច្រៀងតាមអកក្តង់រោងការ ដែលទទួលបានកម្រៃបន្តិចបន្ទួចសម្រាប់ចិញ្ចឹមប្រពន្ធ និងកូន។

រឿងរ៉ាវដ៏មិនគួរឲ្យជឿនេះ ត្រូវបានអ្នកស្គាល់តារាចម្រៀង ប៊ុត សីហា ច្បាស់បានបង្ហើបថា  «រាល់ថ្ងៃ ប៊ុត សីហា ដេកឱបពានគ្មាន​បានការអ្វីឡើយ ហើយពេលខ្លះលោកស្ទើរតែឆ្កួតចិត្ត ត្បិតអីផលិតកម្មយក្ស ដែល សីហា សង្ឃឹមអនាគតថ្មីនោះ ហាក់មិនអើពើនឹង​តារាចម្រៀងម្នាក់នេះឡើយ ដោយទុកឲ្យលោករសាត់ដូចផ្សែងគ្មានទីពំនាក់»។ យ៉ាងណាមិញ តារាចម្រៀង ប៊ុត សីហា នៅតែខំប្រឹងក្នុងអាជីពចម្រៀងតទៅទៀត ទោះជាត្រូវច្រៀងតាមរោងការក៏ដោយ៕