ភ្នំពេញ៖ បន្ទាប់ពីចូលរោងការ តារាចម្រៀង សុគន្ធ នីសា នៅតែមមាញឹកនឹងការងារសិល្បៈដដែល ពោលមិនទាន់លេចដំណឹងថា តារារូបនេះ គ្រោងទៅដំណើរកំសាន្ត និងក្រេបទឹកឃ្មុំនៅទីណានៅឡើយទេ។ ជារឿយៗ តារាចម្រៀងមានប្តីអ្នកជំនួញធំ សុគន្ធ នីសា តែងតែបង្ហោះរូប​តែម្នាក់ឯង និងតែងសរសើរលើកឡើងពីរឿងរ៉ាវជីវិតរបស់នាងប៉ុណ្ណោះ។ តួយ៉ាង កាលពីព្រឹកមិញនេះ តារាចម្រៀង Coach កម្មវិធី The Voice Kids សុគន្ធ នីសា បានបង្ហោះសារថា «មិនមែនជារឿងងាយស្រួលទេជីវិត ដែល​ទម្រាំឆ្លង​កាត់ឧប​សគ្គ​ដើរមកដល់ទីនេះ»។

ជុំវិញសារនេះ ហាក់មានការចាប់អារម្មណ៍តិចតួច ប៉ុន្តែអ្នកគាំទ្រ​បានចាប់អារម្មណ៍រឿងមួយគឺ រឿងរៀបការ។ ក្នុងនោះ ម្ចាស់គណនីអ៊ីនស្ត្រាក្រាមម្នាក់ឈ្មោះ «meixing_chen8» បានលើកឡើងថា «មានប្តីហើយនៅផ្ទះ​ទៅ ហើយក៏អាយុច្រើនហើយដែរ គួរតែយកកូនមួយទៅកុំប្រឹងពេក»។ មកទាល់ពេលនេះ តារាចម្រៀង សុគន្ធ នីសា មិនបានឆ្លើយតបនឹងអ្នកគាំទ្រយ៉ាងណាទេ ពាក់ព័ន្ធគម្រោងយកកូននោះ៕