ក្រចេះ៖ ទោះបីបច្ចុប្បន្ន មានបច្ចេកវិទ្យាទំនើបយ៉ាងណាក្តី ក៏ប្រជាពលរដ្ឋខ្មែរមួយចំនួននៅតែមានជំនឿលើ​អរូបិយ ដូចជា ការបួងសួង ការសែនព្រេន និងការយោលសុបិនជាដើម។ តួយ៉ាងកាលពីពេលថ្មីៗនេះ បុរសវ័យ ៣៥ឆ្នាំម្នាក់ ចេញមុខអះអាងដល់សាលាឃុំថា លោកបានដេកយល់សប្តិឃើញអ្នកតាឲ្យទៅជីកយកវត្ថុបុរាណ លុះព្រលឹមស្រាងៗ លោកបានកាន់ចបមួយសំដៅទៅព្រៃក្រោយផ្ទះ ដោយមិនបានប្រាប់អ្នកណាទាំងអស់ និងបានជីកប្រទះឃើញ​ឃ្លោក ១ និ គីង​គក់ ២ ធ្វើ​ពី​ស្ពាន់​ដូច​ការយល់​សុបិន​​មែន។

តែទោះជាយ៉ាងណា ការអះអាងខាងលើនេះ មិនត្រូវបានសមត្ថកិច្ច និងក្រុមប្រជាពលរដ្ឋជឿទេ ពីព្រោះវត្ថុនោះ មានរាងថ្មីសន្លាង គ្មានប្រឡាក់ ឬ ដុះស្លែរបន្តិចឡើយ ដោយសមត្ថកិច្ចសន្និដ្ឋានថា បុរសនោះ ប្រហែលចាញ់បោកគេ ហើយប្រឌិតរឿងថាជីកកំណប់បាន ក្នងគោលបំណងលក់វត្ថុនោះទៅវិញ ដើម្បីបានលុយខ្លះ។ គួរបញ្ជាក់ថា ហេតុការណ៍ នេះ​បាន​កើតឡើង នៅ ភូមិ​កសាង ឃុំ​ចង្ក្រង់ ស្រុក​ចិត្រ​បុរី ខេត្តក្រចេះ កាលពី ថ្ងៃទី ៨ ខែមករា ឆ្នាំ ២០១៨ ។