ភ្នំពេញ៖ បិតាល្ខោនបាសាក់ ដែលលោកអ្នកធ្លាប់តែឮចាស់ៗ និយាយថា «ក្នុងចំណោមអ្នកសម្តែងល្ខោនបាសាក់ គ្មានអ្នកណាសម្តែងសមជាង លោក សាំង សារុន ទេ»។ តទៅនេះ តារាញូស៍ សូមបង្ហាញពីជីវិតតស៊ូក្នុងការចូលសិល្បៈល្ខោនបាសាក់ របស់លោក សាំង សារុន៖ ក្រោយការបួសរៀនអស់រយៈពេលជាច្រើនឆ្នាំ លោក សាំង សារុន បានសឹកមកវិញ និងចូលប្រឡូកក្នុងវង់ល្ខោនបាសាក់​ឈ្មោះ «ខាន់​» ​ដែល​ជា​កម្មសិទ្ធិរបស់​ភរិយា​មេ​ព្រៃ​ម្នាក់​ក្នុង​ស្រុកស្ទឹងត្រង់ ខេត្តកំពង់ចាម។ បន្ទាប់​មក​​ក្រុម​ល្ខោន​នេះ​ក៏​ត្រូវ​បិទ​ទ្វា​​រ ខណៈឪពុក​​លោក​ សាំង​ សា​រុន​ ដែលជាអភិបាលស្រុកស្ទឹងត្រង់ រករឿង​ខ្លាំង​ ព្រោះ​មិន​ពេញចិត្ត​ដែល​កូន​ប្រុស​ខ្លួន​មក​ចាប់​អា​ជីព​ជា​អ្នក​សម្ដែង​នេះ។ ជាងនេះទៅទៀតឪពុកលោកបានចាប់ឃុំខ្លួនលោក មិនឲ្យចេញទៅក្រៅ។

លុះឆ្នាំ១៩៤០ លោក សាំង សារុន បានលួចរត់ចេញពីផ្ទះពីខេត្តកំពង់ចាម មកក្រុងភ្នំពេញ និងចូល​ក្នុង​វង់​ល្ខោន​ដែល​មាន​ម្ចាស់​ឈ្មោះ​ «ជួប» ក្នុងគ្រានោះ។ ដោយសារភាពប៉ិនប្រសប់ និងសម្លេងពីរោះដូចសារិកានោះ លោក សាំង សារុន បានល្បីរន្ទឺនៅក្នុងវង់ល្ខោននោះតែម្តង ហើយបានអន្ទងចិត្តប្រពន្ធមន្ត្រីធំៗជាច្រើនតាមស្ម័គ្រ រហូតដល់មន្ត្រីធំៗទាំងនោះ បានចាប់លោក សាំង សារុន ដាក់គុកជាង ៣ឆ្នាំ។ ចេញពីគុកមិនទាន់បានប៉ុន្មានផង បិតាល្ខោនបាសាក់ សាំង សារុន បានបង្កើតវង់ល្ខោនបាសាក់ដោយខ្លួនឯង ដែលមានទីតាំងនៅ ខេត្តពោធិ៍សាត់។ ក្រោយមកវង់ល្ខោនបាសាក់របស់ត្រូវបានរំសាយ ខណៈរដ្ឋប្រហារទម្លាក់សម្តេច នរោត្តម សីហនុ បានកើតឡើង ធ្វើឲ្យសមាជិកក្រុមរត់ខ្ចាត់ខ្ចាយគ្នាអស់៕

គួររំឭកថា បិតាល្ខោនបាសាក់​ លោក សាំង​​​ សារុន​ កើតឆ្នាំ១៩២២ ជា​កូនទី​៥ ​ក្នុង​គ្រួសារ​​​ដែល​មាន​ឪពុក​ឈ្មោះ​ ណែម សាំង ​ជា​អភិបាល​ស្រុក​ស្ទឹង​ត្រង់​ និង ម្តាយ​ឈ្មោះ​ ជួប​ អ៉ឹម​ មាន​ស្រុក​កំណើត​នៅ​ក្នុង​​ស្រុក​ស្ទឹង​ត្រង់​ ខេត្ត​កំពង់ចាម។