ភ្នំពេញ៖ ថ្មីៗនេះ ពិធីការិនីល្បីល្បាញរបស់បណ្ដាញទូរទស្សន៍ស៊ីធីអ៊ិន យុគ ចិន្ដា លេចឮ​ថា​អាច​នឹងចូល​រោងការនៅឆ្នាំ២០១៨នេះ បែរ​ជាពេលនេះ​ស្ងប់​ស្ងាត់​បាត់ដំណឹង​សូន្យ​ឈឹង​ទៅវិញ​ទើបធ្វើឲ្យ​មានការសង្ស័យ​ថាចំណង​ស្នេហាអ្នកនាង​ជាមួយបុរស​អាណិកជនខ្មែរ​មកពីអាមេរិក​លោក វុទ្ធី បណ្ឌិត អាចនឹងមានបញ្ហាបានជាមិនឃើញ​ចែកសំបុត្រការ​ទាល់​តែសោះ​តាំងពីបែកធ្លាយ​រឿងស្នេហានេះតាំងពីឆ្នាំ២០១២មក។

ទោះជាយ៉ាងណា​នៅពេលដែលអ្នកការសែតជជីកសួររឿងចូលរោងការនេះរាល់លើកអ្នកនាងយុគចិន្ដានៅតែថា «មិនទាន់កំណត់ពេលវេលាជាក់លាក់ដដែលហើយថានៅពេលនេះអ្នកនាងមានអ្នកពិសេសហើយគ្រាន់តែការងារសិល្បៈរវល់ខ្លាំងពេក និងជាប់រកស៊ីខាងក្រៅផងទើបរកតែពេលរៀបការមិនបាន»។

យុគ ចិន្ដា មានកូនស្រីម្នាក់ដ៍ស្រស់ស្អាតឈ្មោះ យុគ ដាពេជ្រ​ ដែលជិតពេញក្រមុំទៅហើយតែអាថ៌កំបាំងស្នេហ៍របស់ពិធីការិនីរូបនេះនៅតែធ្វើឲ្យមនុស្សជាច្រើនស្ថិតក្នុងភាពអាថ៌កំបាំងដដែលព្រោះអ្នកនាងចិន្ដាមិនដែលលាតត្រដាងស្នេហាជាសាធារណៈឡើយ។ តារាសិល្បៈជាច្រើនចង់ឲ្យអ្នកនាង យុគ ចិន្ដា ចូលរោងការជាមួយលោក វុទ្ធី បណ្ឌិត ព្រោះថាអ្នកនាងទាំង២ពិតជាសាកសមគ្នាទាំងវ័យ និងចំណេះដឹង៕