ភ្នំពេញ៖ លោក ចា រឹទ្ធី ដែលជាអតីតតារាសម្តែងជាងចាស់ សព្វថ្ងៃជាអ្នក​គ្រប់​គ្រង​កម្​មវិធី​កម្សាន្ត​ដ៏មាន​ប្រជា​ប្រិយ​ភាពនៅទូរទស្សន៍អាស៊ីអាគ្នេឃ៍ ។ លោកបានប្រកាសរកក្មេងប្រុសដែល ទទួលបានការ​ចាប់អារម្មណ៍​ច្រើនពីសំណាក់បងប្អូនអ្នកប្រើប្រាស់បណ្តាញសង្គមហ្វេសប៊ុក តាមរយៈការបញ្ចេញទឹកដមនៃការច្រៀងបទ បាត់ដំបងបណ្តូលចិត្ត ឲ្យមកច្រៀងក្នុងកម្មវិធីទូរទស្សន៍។ នៅក្នុងបណ្តាញសង្គមបន្ទាប់ពីទទួលការគាំទ្រខ្លាំង ពីកុមារា ពេជ្រ ថៃ ទាំងទឹកដមសំនៀងនិងភាពវៃឆ្លាត ដែលឡើងប្រឡងចម្រៀងនៅទូរទស្សន៍ហង្សមាស ប៉ុន្តែដោយឡែកថ្មីៗនេះលេចឡើងកុមារា ធឿន បូរី វ័យ១២ឆ្នាំមានស្រុកកំណើតនៅខេត្តកំពង់ចាម។

ស្ថិតក្នុងសម្លៀកបំពាក់ឈុតពណ៌ក្រហមខោខ្លីអាវយ៉ីត ក៏មិនចាញ់ កុមារា ពេជ្រ ថៃ ដែរជាមួយ​នឹង​ការ​បក​ស្រាយ​​បទចម្រៀងលោក តា សិនស៊ី សាមុត បទ បាត់ដំបងបណ្តូលចិត្ត ក៏កំពុងធ្វើឲ្យមហាជន​ជាច្រើន​ផ្ទុះ​ការ​គាំទ្រ នឹងនាំគ្នាដាក់ពិន្ទុថា ធឿន បូរី មិនចាញ់ពេជ្រ ថៃ នោះទេ ។ ព្រមនឹងការប្រៀបប្រដូចនេះ ក៏ផ្អើលអ្នក​ផលិតកម្មវិធីកម្សាន្តនៅទូរទស្សន៍ អាស៊ីអាគ្នេឃ៍ លោក ចា រឹទ្ធី ប្រកាសរកកុមារា ធឿន បូរី ឡើងច្រៀង​នៅក្នុង​កម្មវិធីរបស់លោក ក្នុងកញ្ចក់ទូរទស្សន៍អាស៊ីអាគ្នេឃ៍។

ក្នុងគណនីហ្វេសប៊ុក អ្នកគ្រប់គ្រងកម្មវិធីកម្សាន្តនៅទូរទស្សន៍អាស៊ីអាគ្នេឃ៍ លោក ចា រឹទ្ធ សរសេរ​រៀប​រាប់​ថា​«បងប្អូនជាទីស្រលាញ់ទាំងអស់ បើសិនជាមានអ្នកណាបានជួបរឺស្គាល់ប្អួនប្រុសម្នាក់នេះ សូមជួយប្រាប់ខ្ញុំផង ខ្ញុំនឹងឲ្យគាត់ច្រៀងនៅទូរទស្សន៍អាស៊ីអាគ្នេយ៍ រឿងការចំណាយទូទៅនិងកន្លែងស្នាក់នៅខ្ញុំជាអ្នកចេញទាំងអស់ សូមអរគុណទុកជាមុន»។ ដូចនេះតាមរយៈការប្រកាសនេះធ្វើឲ្យប្អូនម្នាក់កាន់តែល្បី និងមានអនាគតភ្លឺស្វាង។