នៅទីបំផុតកម្មពិធីប្រឡងចម្រៀងលំដាប់ពិភពលោក Cambodian idol junior បានរកឃើញម្ចាស់ជយលាភីរដូវកាលទី២ហើយ គឺបានទៅលើកុមារី សំ លីដា ។
នៅវគ្គផ្ដាច់ព្រ័ត្រកាលពីយប់មិញនេះមានកុមារជើងខ្លាំងចំនួន៤រូបដែលត្រូវប្រកួតប្រជែងគ្នានៅលើឆាកដើម្បីយកឈ្នះចិត្តរបស់ទស្សនិកជនឱ្យបោះឆ្នោតជូនពួកគេ ដើម្បីក្លាយជាម្ចាស់ពានរដូវកាលទី២នេះ ។ កុមារដែលមានសមត្ថភាព និងទេពកោសល្យដែលអាចឡើងមកដល់វគ្គផ្ដាច់ចុងក្រោយនេះមានកុមារា វាសនា ធិណារាជ កុមារី សំ លីដា កុមារា ញឹម កូវីត និងកុមារា សំ ចាន់រ័ត្ន ។ ពួកគេទាំង៤រូបនេះសុទ្ធសឹងតែជាជើងខ្លាំងដូចៗគ្នា ។ ប៉ុន្តែនៅវគ្គ Final នាយប់មិញនេះ កម្មពិធីត្រូវឱ្យមានតែកុមារជើងខ្លាំងតែម្នាក់គត់ដែលអាចក្លាយជាម្ចាស់ពាន ។
នៅទីបំផុតកុមារី សំ លីដា បានយកឈ្នះចិត្តទស្សនិកជនដោយទទួលបានសំឡេងឆ្នោតច្រើនជាងគេ និងបានក្លាយជាម្ចាស់ជយលាភីនៃកម្មពិធីប្រឡងចម្រៀងលំដាប់ពិភពលោក Cambodian idol junior រដូវកាលទី២ ។ ភាពជោគជ័យរបស់កុមារី សំ លីដា ត្រូវបានមហាជនជាច្រើនសាទរ ។
សូមបញ្ជាក់ថា កុមារី សំ លីដា មានអាយុ១៤ឆ្នាំ មានកម្ពស់១៦៥cm មកពីខេត្តព្រៃវែង ។ លីដា ជាម្ចាស់ពានរដូវកាលទីនៃកម្មពិធីលំដាប់ពិភពលោក Cambodian idol junior ខណៈម្ចាស់ពានរដូវកាលទី១បានទៅលើកុមារាវ័យ១៥ឆ្នាំមកពីខេត្តកំពង់ចាម ភឿន សុភាព ៕
