បាត់ដំបង៖ តារាភាពយន្តជើងចាស់ សម្តែងតួឪពុកលោក តា រិទ្ធ សារី ទាំងវ័យ៧៦ឆ្នាំ រស់នៅនឹងជីវភាពខ្វះមុខខ្វះក្រោយ នៅទឹកដីកំណើតខេត្តបាត់ដំបង នៅថ្ងៃទី៧ខែសីហា មូលនិធិចាស់ជរា ពីសមាគមមិត្តសិល្បៈស្មគ្រចិត្តជួយសង្គមបានផ្តល់អំណោយមនុស្សធម៌ ដើម្បីជួយសម្រាលជីវភាពសិល្បករវ័យចំណាសរូបនេះ។
លោក ហេង ឡុង បានឲ្យវេបសាយតារាថ្មីដឹងថា «មូលនិធិចាស់ជរាកាលពីថ្ងៃទី៨ខែសីហានេះ បានធ្វើជាអំណោយមនុស្សធម៌ដល់សិល្បករចាស់ជារារស់នៅក្នុងភាពទីទាល់ក្រនៅលើទឹកដីខេត្តបាត់ដំបងចំនួនពីរនាក់ ។ មាននាយ ស្មាន់ តឿ អតីតអ្នកកំប្លែងក្នុងវង្សល្ខោនលោកតាព្រួញមាស និងម្នាក់ទៀត គឺជាតារាសម្តែងជើងចាស់ សម្តែងតួឪពុកគឺលោក តា រិទ្ធ សារី»។ លោក ហេង ឡុង បានបញ្ជាក់ថា «អំណោយមនុស្សធម៌ ពីមូលនិធិចាស់ជរារបស់សមាគមមិត្តសិល្បៈស្មគ្រចិត្តជួយសង្គម បានផ្តល់ជួយលោកតា រិទ្ធ សារី ចំនួន១លានរៀលរួមគ្រឿងឧបភោគបរិភោគផងដែរ»។
សាទរនឹងទានមនុស្សធម៌ផ្តល់ពីមូលនិធិចាស់ជរានៃសមាគមមិត្តសិល្បៈស្មគ្រចិត្តជួយសង្គម តារាភាពយន្តជើងចាស់ដែលមានវ័យ៧៦ឆ្នាំ លោក តា រិទ្ធ សារី ក៏បន្ថែមពីកាយវិការអរគុណម្ចាស់ទានដោយលើកដៃសំពះ ។ លោកក៏បានជួនពរដល់ហេង ឡុង ប្រធានសមាគមមិត្តសិល្បៈស្មគ្រចិត្ត ដែលលោកមានចិត្តមនុស្សធម៌បញ្ជួនទាននេះដល់ខ្ញុំរស់នៅកម្សត់ខ្វះខាតនៅខេត្តបាត់ដំបងឲ្យជួបតែក្តីសុខនិងសំណាងល្អជោគជ័យលើការងារនេះ។
