ភ្នំពេញ: ដំណើរ​ជីវិតរ​ស់នឹង​វិប្បដិសារី​​ជំងឺ​ប្រចាំ​កាយ ឆ្ងាយ​ពីភាព​ស្និទ្ធស្នាល​អស់​ញាតិ​សន្តាន អាជីព​សិល្បៈ​ក៏​សូន្យ​បង់ អ្នកនាង អ៊ុំ គន្ធា ដែល​ជា​អតីត​តារា​ចម្រៀង​ល្បី​ក្នុង​អំឡុង​ទសវត្សរ៍​ឆ្នាំ ២០០០ ទាំង​ភាព​សិចស៊ី​គ្មាន​តារា​ស្រី​ណា​ហ៊ាន​ប្រៀប​នោះ នៅ​រដូវ​បុណ្យ​កាន់​បិណ្ឌ​ឆ្នាំ​នេះ​ក៏ត្រូវ​បានគេ​ទម្លាយថា អ្នក​នាង អ៊ុំ គន្ធា ធ្លាក់ខ្លួនខ្លាំងដល់ថ្នាក់ ​ដាច់​ចិត្ត​ហាសុំ​លុយ​មិត្តភក្ដិ​។

ថ្មីៗនៅ​ក្នុង​គណនី​ហ្វេសប៊ុក​របស់​អ្នកនាង ស៊ិន ឧត្តមផល្លា អតីត​តារា​ជើង​ចាស់​នៅ​ប្រកប​របរ​លក់​ស្បង់​ចីវរ បាន​បង្ហាញ​ថា៖«អ្នកនាង អ៊ុំ គន្ធា មួយ​រយៈ​មុន​មាន​អ្នក​ជួយ​ជ្រោម​ជ្រែង​ឲ្យ​អ្នកនាង​បាន​ធ្វើការ​នៅ​ក្នុង​ក្រសួង​មួយ ប៉ុន្តែ​ក្រោយ​មក​បាន​មួយ​ឆ្នាំ​ក្រសួង​នោះ​ក៏លុប​ឈ្មោះ​អ្នកនាង​ចេញ​វិញ ដោយ​មិន​ដឹង​មូលហេតុ។ ហេតុ​ដូច្នេះ​អ្នកនាង​មិន​ដឹង​ជា​មានអ្វី​ទីពឹង។ អ្នកនាង​ក៏​សំណូមពរ​ឲ្យ ផេក Movies star research ចុះផ្សាយ​ពីក្តី​វេទនា​របស់​អ្នកនាង ឲ្យ​មហាជន​បាន​ដឹង»។

 គណនី​ហ្វេសប៊ុក អតីត​តារា​សម្តែង ស៊ិន ឧត្តមផល្លា បាន​បង្ហាញ​ថា៖ «អ្នកនាង អ៊ុំ គន្ធា គាត់​នៅតែ​ទទួច​សុំការ​យោគ​យល់ ពី​កម្មវិធី​ទូរទស្សន៍​នានា ឲ្យ​នាង​បាន​ឡើង​ច្រៀង និង​បាន​ប្រាក់​ចិញ្ចឹម​ជីវិត»។ អ្នកនាង ស៊ិន ឧត្តមផល្លា ឲ្យដឹង​ថា អ្នកនាង អ៊ុំ គន្ធា បាន​ផ្ញើ​សារ​មកសុំ​ថវិកា​ខ្លះៗ​ដើម្បី​យក​ទៅ​លៃលក​ធ្វើ​ចង្ហាន់​ទៅ​វត្ត ហើយ​ខ្ញុំ​ក៏​បាន​ជួន​លុយ​គាត់បន្តិច​បន្តូច​ដើម្បី​យកធ្វើ​ចង្ហាន់​ទៅ​វត្ត តាមការសុំរបស់​គាត់​ដែរ​»៕