ភ្នំពេញ៖ នៅ​ឱកាស​បុណ្យ​ភ្ជុំបិណ្ឌ ក្តីសង្វេកហាក់​លេច​ឡើង​ចំពោះ​ អតីត​តារាចម្រៀង អ្នកនាង អ៊ុំ​ គន្ធា ដែល​កំពុង​រស់​នៅ​ជាមួយ​នឹង​ការយាយ៉ីពី​ជំងឺប្រចាំកាយដ៏​កាចសាហាវ តែនៅ​មាន​ចិត្ត​អន្ទះសារ​ចង់ធ្វើ​ចង្ហាន់​ទៅដាក់​បិណ្ឌប្រគេនព្រះសង្ឃនៅ​វត្ត។

សាទរនឹង​ទឹកចិត្តដ៏​ជ្រះថ្លា របស់​អតីត​តារាចម្រៀង​ អ្នក​នាង អ៊ុំ គន្ធា ទាំង​រូប​រាង​កាយ​កំពុង​ស្ថិត​នឹង​ជំងឺប្រចាំកាយ ខ្សោះ​ទាំង​ថាមពល ក៏​នៅ​នឹក​ដល់​ការធ្វើ​បុណ្យ​សន្សំកុសលនោះ នៅ​ល្ងាចថ្ងៃ​ទី​១៨ខែកញ្ញា ត្រូវ​នឹង​ថ្ងៃ​ដាក់បិណ្ឌ​ទី​១៣  អ្នក​នាង ចន ច័ន្ទលក្ខិណា ប្រធាន​សមាគមសិល្បករខ្មែរ​ទើបនិង​ឡើង​ថ្មី ក៏​បាន​នាំយក​អំណោយ​មូល​និធិសិល្បៈ​ចាស់​ជរា មាន​​ថវិកា គ្រឿងឧបភោគបរិភោគ ជួន​ទៅ​អតីតតារាចម្រៀង អ៊ុំ គន្ធា ដល់​ផ្ទះ​នៅ​ក្នុង​ទឹក​ដី​ភ្នំពេញថ្មី​។

ក្នុង​ដំណើរ​នាំយក​មូលនិធិសិល្បៈចាស់ជរា ជួន​អ្នកនាង អ៊ុំ​ គន្ធា ដែល​កំពុង​មាន​ជំងឺប្រចាំ​កាយ ជាមួយ​នឹង​បន្ទុក​ចិញ្ចឹម​កូនប្រុសចំនួនពីរនាក់ រួមនឹង​ម្តាយ​ផងនោះ គឺមាន​ លោក ឧកញ្ញ៉ា ទុំ សារ៉ុត ហៅ នាយ ឃ្លោក លោក អ៊ឹម ជីវ៉ា លោក គន់ រៀមរតនៈ រួម​នឹង​សិល្បករ សិល្បការិនី​ជាច្រើន​ផង​ដែរ ក៏​បាន​រួម​ដំណើរ​ទៅ​លើក​ទឹក​ចិត្ត​អ្នក​នាង អ៊ុំ គន្ធា ដែលកំពុង​រស់​នៅជាមួយ​ជំងឺប្រចាំកាយ​។