ភ្នំពេញ៖ អតីតពលករកូរ៉េ ឡេង ណាវ៉ាត្រា បានពុះពារគ្រប់ឧបស័គ្គ សន្សំ​លុយ​ខណៈលោកកំពុងធ្វើការនៅប្រទេសកូរ៉េកាលពីប៉ុន្មានឆ្នាំមុន មក​ធ្វើ​អាជី​វ​កម្មនៅស្រុកខ្មែរដែលទទួលបានជោគជ័យបំផុត រហូត​ទទួល​បាន​ងារ​ជា​ឧកញ៉ាទៀតផង។ ក្រោយស្ទុះផុតពីភាពក្រីក្រលោក ឡេង ណាវ៉ាត្រា បាន​ចូល​រួមធ្វើការងារសង្គមធំៗយ៉ាងច្រើន រួមមានការចូលរួមបរិ​ច្ចាគ​ថវិកា​ជួយ​មន្ទីរ​ពេទ្យគន្ធបុប្ផា និងការដឹកនាំសិល្បករសិល្បៈការិនីទៅ​ធ្វើ​សង្រ្កាន្ត​នៅ​ប្រទេស​កូរ៉េកាលពី​ឱកាសបុណ្យចូលឆ្នាំថ្មីប្រពៃណីជាតិខ្មែរ កន្លង​ផុត​ទៅថ្មី​ៗនេះ និងមានសកម្មភាពសង្គមជាច្រើនទៀត។ ដោយឃើញគំរូដ៏ប្រពៃនេះ​ហើយបានជាសម្តេចតេជោ ហ៊ុន សែន បានលើកសរសើរឈ្មោះលោកនៅ​ពិធី​សំណេះសំណាលជាមួយលោកគ្រូអ្នកគ្រូកាលពីពេលថ្មីៗនេះ។

ក្នុងនោះ សម្តេចតេជោ ហ៊ុន សែន បានថ្លែងថា «ឡេង ណាវ៉ាត្រា ជាពល​ករ​​កូរ៉េ​តែម្នាក់​ដែលក្នុង​ពេលធ្វើ​ការ​បានសន្សំ​លុយ​កាក់​ទិញដីទិញ​ធ្លី ហើយ​ក្រោយ​​ត្រលប់មក​វិញ​ក៏ក្លាយ​ជាអ្នក​ជំនួញដីធ្លី និងជាម្ចាស់​បុរីធំ​មួយត្រឹមតែ​វ័យប្រមាណ​ ៣០ឆ្នាំ»។ មិនត្រឹមតែជា​អ្នកជំនួញម្នា​ក់ប្រកប​ដោយភាព​ជោគ​ជ័យ​ប៉ុណ្ណោះទេ លោកត្រូវបានគេស្គាល់ថា ជាម្ចាស់ផលិត​កម្មកា​ឡាក់​ស៊ី​ផង​ដែរ។

យ៉ាងណាការសរសើររបស់សម្តេចតេជោ ហ៊ុន សែន ជាមហាកិត្តិយ​សម្រាប់​លោក​ឧកញ៉ា ឡេង ណាវ៉ាត្រា ដែលនាពេលកន្លងមកសម្តេចមិនធ្លាប់សរសើរ​ជនសាមញ្ញ ក្រៅតែពីមន្ត្រីជាន់ខ្ពស់ក្នុងរាជរដ្ឋាភិបាលឡើយ។ ឧកញ៉ាវ័យ​ក្មេង ឡេង ណាវ៉ាត្រា បានលើកឡើងថា «ខ្ញុំពិត​ជាសប្បាយ​ចិត្តណាស់ ដែល​សម្ដេច​​​ចាប់​អារម្មណ៍​ខ្ញុំ។ គាត់មាន​កិច្ចការ​ច្រើន​ជំពូក ក៏ប៉ុន្តែ​បានផ្ដល់​កិត្តិយស​ខ្លាំងសម្រាប់​ខ្ញុំ ដែលបាន​ជួយការងារ​សង្គម​តិចតួច។ នេះជា​កិត្តិយស​លើស​ពីការរំពឹង​ទុករបស់ខ្ញុំ»។

ការចេះអភិវឌ្ឍខ្លួនរបស់ចាងហ្វាងផលិតកម្មកាឡាក់ស៊ី ឡេង ណាវ៉ាត្រា នេះត្រូវបានសម្តេចតេជោលើកឡើងម្តងហើយម្តងទៀត ក្នុង​គោល​បំណង​ចង់​បង្ហាញ​​គំរូដ៏ល្អដល់បងប្អូនខ្មែរ ដែលជាពលករធ្វើការក្រៅប្រទេសត្រូវបានចេះ​កែ​ប្រែខ្សែជីវិតរបស់ខ្លួនឯងឲ្យបានប្រសើរ ដូច​ពាក្យ​ស្លោក​មួយ​ឃ្លា​លើក​ឡើង​ថា «គ្មានព្រះឯណាមកជួយយើងបានក្រៅពីខ្លួនឯងឡើយ»។