ភ្នំពេញ: ក្នុង​រាត្រី​ដ៏សែន​មហោឡារិក​នៃ​ពិធី​ទទួល​ស្វាគមន៍​ម្ចាស់​ពានរង្វាន់​ចាប៉ី​ដងវែង ព្រឹទ្ធាចារ្យ​កោសល្យ​វោហារ គង់ ណៃ វិល​ពី​ទទួល​ពាន​រង្វាន់​ហ្វូកុអូកា​ពី​ប្រទេស​ជប៉ុន នៅ​ក្នុង​សាល​សន្និសីទ​ចតុមុខ ដែល​អម​ដោយ​វត្តមាន​មន្ត្រី​ក្រសួង​វប្បធម៌ និង​វិចិត្រសិល្បៈ និង​សិល្បករ​សិល្បការិនី ក្នុង​ចំណោម​វត្តមាន​នោះ តារា​ចម្រៀង​ច្បាស់​នឹង​ទម្រង់​សិល្បៈ​បុរាណ កញ្ញា ស៊ូ ដាណេ បាន​ធ្វើ​ឲ្យ​អ្នកសិល្បៈ​រួម​អាជីព​ភ្ញាក់ផ្អើល​នឹង​ជំហរ​តាំង​ចិត្ត​ធ្វើ​អ្នក​ស្នង​មរតក​ចាប៉ី​ដងវែង។

នៅ​ក្នុង​សង្គម​សិល្បៈ សុទ្ធតែ​បាន​ដឹង​ហើយ​ថា កញ្ញា ស៊ូ ដាណេ ដែល​មាន​សម្បុរ​ខ្មៅ​ស្រអែម នាង​មិន​ត្រឹមតែ​ជា​តារា​ចម្រៀង​នោះ​ទេ ពោល​គឺ​តារា​ស្រី​រូបនេះ ក៏ជា​គ្រូបង្ហាត់​របាំ​បុរាណ ហើយ​រយៈពេល​ចុងក្រោយ​នាង​ក៏​វិវត្ត​ធ្វើ​ជាតួ​សម្តែង​ល្ខោន​បាសាក់​ផងដែរ។

ប៉ុន្តែ​ទន្ទឹម​នឹង​ភាព​ភ្ញាក់ផ្អើល​ពីជំហរ​ដែល​នាង​បង្ហាញ​មហិច្ឆតា​ដើរ​លើ​គន្លង​សិល្បៈ​បុរាណ ផ្នែក​ចាប៉ី​ដងវែង នៅ​ក្នុង​រាត្រី​ប្រជាជាតិ​ខ្មែរ សាទរ​នឹង​ព្រឹទ្ធាចារ្យ​ចាប៉ី​ដងវែង គង់ ណៃ វិល​ពី​ទទួល​ពាន​រង្វាន់ ហ្វូកុអូកា​នៅ​សាល​សន្និសីទ​ចតុមុខ ពេល​នេះ​លោកគ្រូ ចាន់ ផល ប្រធាន​សិល្បៈ​រាជធានី ដែល​នាំ កញ្ញា ស៊ូ ដាណេ ឡើង​សំពះ លោកតា គង់ ណៃ សុំ ធ្វើ​ជាគ្រូ​រៀន​ជំនាញ​សិល្បៈ​ចាប៉ី លោក បាន​បង្ហាញ​ថា៖ «ខ្ញុំ​សប្បាយចិត្ត​ដែល​មាន​អ្នកសិល្បៈ​ជំនាន់​ក្រោយ ដាក់ចិត្ត ដាក់​កាយ​រៀន​អំពី​ជំនាញ​សិល្បៈ​ចាប៉ី ដែល​ទម្រង់​នេះ ក្រសួង​ក៏មាន​ក្តីបារម្ភ ពី​កង្វះ​អ្នក​បន្តវេន»។