ក្រុងហ្វ៊ូកុអូកាៈ ទោះ​បីជា​ធ្លាប់​មាន​អារម្មណ៍​អាក់អន់​ស្រពន់​ចិត្ត​ពី​ភាព​ពិការ​ភាព​តាំងពី​វ័យ ៤ ឆ្នាំ​មក និង​គិតថា ខ្លួនឯង បាន​នាំ​ភាព​លំបាក​យ៉ាង​ច្រើន​ទៅ​ដល់​ក្រុម​គ្រួសារ ជាពិសេស​គឺ​លោក​ឪពុក អ្នក​ម្តាយ តែ​ថ្មីៗ​នេះ លោក​ព្រឹទ្ធាចារ្យ​ចាប៉ី​ដងវែង គង់ ណៃ ក្លាយ​ជាជន​ឆ្នើម​ម្នាក់ ក្នុង​ចំណោម​អ្នក​ឆ្នើម ៣ រូប​នៃ​ប្រទេស​តំបន់​អាស៊ី-អាគ្នេយ៍​បាន​ទៅ​ទទួល​ពាន​រង្វាន់​ហ្វ៊ូកុអូកា ប្រចាំ​ឆ្នាំ ២០១៧ (Fukuoka Prize 2017) នៅឯ​ទីក្រុង និង​ខេត្ត ហ្វ៊ូកុអូកា ប្រទេស​ជប៉ុន ជាមួយ​នឹង​បេក្ខជន​ឆ្នើម​ជាតិ​ថៃ និង​ចិន។

ព្រឹទ្ធាចារ្យ​ចាប៉ី​ដងវែង ដែល​ទទួល​បាន​គោរម្យងារ​ពី​ព្រះមហាក្សត្រ​ខ្មែរ​ថា «ទេពកោសល្យ​វោហារ គង់ ណៃ» នា​ប៉ុន្មាន​ឆ្នាំ​មុន​នេះ បាន​លះបង់​ពេលវេលា​យ៉ាងយូរ​លើ​ការហាត់​រៀន​ច្រៀង​ចាប៉ី និង​មាន​ភាព​ឈ្លាសវៃ​ទៅ​លើការ​ចងចាំ​សាច់រឿង និង​ពូកែ​ខាងការ​ចាប់​យក​ចុងចួន​នៃ​ពាក្យ​ពេចន៍​ច្រៀង គួរឲ្យ​កោត​សរសើរ​រូបនេះ​បាន​ចេញ​ពី​ប្រទេស​កម្ពុជា ដើម្បី​ទៅ​ទទួល​ពាន​ហ្វ៊ូកុអូកា ឆ្នាំ ២០១៧ កាល​ពី​ថ្ងៃ​ទី ១៨ ខែ​កញ្ញា និង​បាន​វិល​មក​ស្រុក​ខ្មែរ​វិញ​នៅ​ថ្ងៃទី ២៤ ខែ​កញ្ញា ឆ្នាំ ២០១៧។

លោក​ព្រឹទ្ធាចារ្យ គង់ ណៃ មាន​វ័យ ៧១ ឆ្នាំ និង​ភរិយា​មាន​វ័យ ៧៤ ឆ្នាំ ឈ្មោះ សាត់ ឆេន មាន​លំ​នៅឋាន​កំណើត​នៅ​ភូមិ​ដូង ឃុំ​ស្វាយទង​ខាងជើង ស្រុក​កំពង់ត្រាច ខេត្ត​កំពត ព្រមទាំង​មាន​បុត្រាបុត្រី​សរុប​ចំនួន ១១ រូប ខណៈ​នៅ​រស់​បច្ចុប្បន្ន​មាន​ចំនួន ១០ រូប (ប្រុស ៦) បាន​ថ្លែង​ពី​អារម្មណ៍​ដ៏រំភើប​ចិត្ត​ខ្លាំង ចំពោះការ​ទទួល​បាន​ពាន​រង្វាន់​ផ្នែក​សិល្បៈ និង​វប្បធម៌ ដែល​ជា​កិត្តិយស ដ៏​ឧតុង្គ​ឧត្តម្ភ​សម្រាប់​ខ្លួនឯង និង​ប្រទេស​ជាតិ ថា៖ «ខ្ញុំ​រំភើប និង​សប្បាយចិត្ត​ជា​ពន់ពេក សម្រាប់ការ​ប្រគល់​ពានរង្វាន់​ពី​ខាង​ម្ចាស់​រៀបចំ​កម្មវិធី​នៅ​ឯ​ទីក្រុង និង​ខេត្ត ហ្វ៊ូកុអូកា ប្រទេស​ជប៉ុន»។