ភ្នំពេញ៖ ព្រមនឹងទឹកចិត្តសិល្បៈរួមគ្នាយ៉ាងសស្រាក់សស្រាំ រំលែកការខ្វះខាត់ លើអម្រែកទុក្ខ លោក យូ ឌីស្កូ ដែលជាតារាសម្តែង កំពុងមានជំងឺទឹកនោមប្រៃយ៉ាងធ្ងន់ធ្ងរ ត្រូវការបញ្ចូលឈាមជាចាំបាច់ ដែលសិល្បករសិល្បការិនីជាច្រើន ស្វះស្វែងធ្វើការបរិច្ចាគឈាមជួយនោះ។

កំពូលតារាចម្រៀង លោកខេមរៈ សិរីមន្ត ក៏មានទឹកចិត្តបរិច្ចាគថវិកាជួយផងដែរ។ តាមការបញ្ជាក់ពីអ្នកនាង ចន ច័ន្ទលក្ខិណា ប្រធានសមាគមសិល្បករខ្មែរបានឲ្យដឹងថា «លោក ខេមរៈ សិរីមន្ត ដែលជាតារាចម្រៀងល្បីនៅផលិតកម្មហង្សមាស ដែលបង្ហាញពីទឹកចិត្តអាណិតអាសូដល់លោក យូ ឌីស្កូ ដែលកំពុងមានជំងឺ ហើយក៏ត្រូវការជំនួយទាំងថវិកនិងឈាមដើម្បីបញ្ចូលរយៈពេលបីថ្ងៃជាប់គ្នា»។

 

ប្រធានសមាគមដែលលេចឡើងនូវសកម្មភាពជួយតារាសិល្បៈ ដោយមិនគិតពេលវេលាសម្រាកសម្រានរូបនេះ ក៏បានបញ្ជាក់ថា «ក្រៅពីការផ្តាំផ្ញើសួរសុខទុក្ខដល់លោក យូ ឌីស្កូ ដែលពោលថា ស្តាយមិនទាន់មានពេលនោះ លោក ខេរមៈ សិរីមន្ត ក៏បានឧបត្ថម្ភថវិកា តាមរយៈខ្ញុំមកជួយលោក យូ ឌីស្កូ ចំនួន១លានរៀល ហើយលោកប្រាប់បើមានពេលនឹងឆ្លៀតមកសួរសុខទុក្ខ ឌីស្កូជាថ្មីដើម្បីជួយលើកទឹកចិត្តបន្តទៀត»។