ភ្នំពេញ​៖ លោក ឡេង ណាវ៉ាត្រា​ ដែល​គេស្គាល់ថា​ ជាអតីតពលករ​នៅ​ប្រទេស​កូរ៉េ ដែល​បាន​ផ្លាស់ប្តូរ​វាសនា ក្លាយ​ខ្លួនជា​ថៅ​កែផលិតកម្មGalaxy ជាមួយ​នឹង​ជំនួញអចលនៈទ្រព្យ​ក៏កំពុង​ជោគជ័យ ។ ថ្មី​ៗលោក​បាន​ស្គាល់​​មក​ជួប​លោក ហេង ឡុង​ ដល់​ទីស្នាក់ការ​សមាគមមិត្តសិល្បៈស្មគ្រចិត្ត​ដើម្បី​ជួយ​សង្គម​ ខណៈអតី​ត​ពល​កម្មឆ្លងទ្វី​ប រូបនេះ​ក៏​​បង្ហាញ​ពី​ការសហការណ៍​យ៉ាង​ទទួច​ជាមួយនឹងសកម្មភាពមូលនិធិចាស់ជរា​ របស់​សមាគម​លោក ហេង ឡុង​​ ។

ក្នុង​ជំនួប​នោះ ផលិតករវ័យ​ក្មេង វិវត្តន៍ខ្លួន​ពី​ឈ្មោះ ដ៏កម្សត់ អតីតពលករនៅប្រទេស​​កូរ៉េ លោក ឡេង ណាវ៉ាត្រា ក៏​បង្ហាញ​ឲ្យ​លោក​ហេង ឡុង ដឹងផងដែរថា «នៅ​រយៈពេល​ប្រហែលជាកន្លះខែខាងមុខនេះ ខ្ញុំ​មាន​គម្រោង​ យក​ថវិកា​ចំនួន​១០០លានរៀល​ជួយ​ដល់​ កាកបាទក្រហម​កម្ពុជា ដើម្បីរួម​ចំណែក​ដោះ​ស្រាយ​ការងារសង្គម​។ ដែល​ទឹកចិត្តនេះ​ខ្ញុំសម្រេច​​ធ្វើ​​ឡើង​​នៅចំថ្ងៃ ដែលខ្ញុំ​បើសម្ភោធលក់​គម្រោង​ផ្ទះវីឡាកូនកាត់ នៅ​ខាងក្រោយ​​ផ្សារកាណាស៊ីធី ផ្លូវ​វេងស្រេង​»។

ដើម្បី​ផ្សារភ្ជាប់​​ខ្លួន​នឹងការងារមនុស្សធម៌និង​​ដើម្បី​រំលែក​ទុក្ខ​លំបាកអ្នក​សិល្បៈ​​រួម​អាជីព ក៏​ដូច​ជារៀម​ច្បង​សិល្បៈ ថៅ​កែផលិតកម្មGalaxy ដែលជាអតីតពលករនៅប្រទេសកូរ៉េ កាលពី​៥ឆ្នាំមុននោះ លោក ឡេង ណាវ៉ាត្រា ក៏​បង្ហាញ​ប្រាប់​លោក ហេង ឡុង ថា ពេលនេះ​ទៅ​​ខ្ញុំ​នឹង​ចូលរួមជាមួយ​សកម្មភាព​មូលនិធិសិល្បៈ​ចាស់ជរា ចំនួន​៥០លានរៀល ដើម្បីចុះជួយសិល្បករ សិល្បការិនីចាស់ជរា និង​កំពុង​​មាន​ទុក្ខ​ផង​»។