ភ្នំពេញៈ តារា​សម្តែង​ស្រី និង​ពិធីការិនី​ទូរទស្សន៍​សម្រស់​នៅ​តែ​ស្អាត សាច់​សខ្ចី និង​ដើម​ទ្រូង​សិចស៊ី កញ្ញា គង់ វង្សយ៉ាទី ទើប​តែ​ដូរ​ស៊េរី​រថយន្ត​ចាស់ Lexus 300 មក​ជិះ Lexus GX 470 កាល​ដើម​ឆ្នាំ​សោះ ថ្មីៗ​នេះ​ក៏ស្រាប់​តែ​មក​ជិះ​រថយន្ត​ថ្មី​សន្លាង​ម៉ាក Porsche វិញ នេះ​បើតាម​សារ​បង្ហោះ​ប្រាប់​ថា៖ «Hello សមាជិក​ថ្មី» តាម​អ៊ីនស្តាក្រាម មួយ​រំពេច​ក្រោយ​មក​ក៏លុប​រូប និង​សារ​នោះ​ចោល​វិញ។

តាមរយៈ​សារ​បង្ហោះ​នាពេល​ប៉ុន្មាន​ម៉ោង​តាម​បណ្តាញ​អ៊ីនស្តាក្រាម គឺ​បញ្ជាក់​ច្បាស់​ណាស់​ថា តារា​សម្តែង​ស្រី​កញ្ញា គង់ វង្សយ៉ាទី ពិតជា​បាន​ដូរ​មក​ជិះ​រថយន្ត​ថ្មី​ម៉ាក Porsche ហើយ​នោះ​ទំនង​ជា​នាង​ដឹងថា ច្បាស់​ក្លាយជា​ចំណោទ​បញ្ហា​នៃការ​ជជីក​សួរ ទើប​នាង​បាន​សម្រេច​លប់​រូប​ចោល​វិញ ហើយ ភ្នំពេញ ប៉ុស្តិ៍ ក៏មិន​ទទួល​បាន​ការ​ស្រាយ​បំភ្លឺ​យ៉ាងណា​ដែរ​ពី​រូបនាង ខណៈ​ទូរស័ព្ទ​លើក​ដំបូង ត្រូវ​បាន​នាង​លើក​ទទួល ដោយ​គ្រាន់​តែ​ប្រាប់​ខាង​សារព័ត៌មាន​ភ្លាម នាង​ក៏បិទ​ទូរស័ព្ទ​វិញ​ភ្លែត។

គេ​សង្កេត​ឃើញ​មួយរយៈ​ពេល​ចុងក្រោយ​នេះ គេ​ឧស្សាហ៍​ឃើញ កញ្ញា គង់ វង្សយ៉ាទី បង្ហោះ​រូប​សម្ភារ​ប្រើប្រាស់​ទំនើបៗ និង​មាន​តម្លៃ​ថ្លៃ តាម​បណ្តាញ​សង្គម​ណាស់ ជារឿយៗ​ក៏ធ្វើ​ឲ្យ​មហាជន​មានការ​ងឿងឆ្ងល់​ពី​ប្រភព​ធនធាន​ទិញ​របស់​របរ​ទាំង​នោះ ខណៈ​នាង​តែងតែ​ច្រានចោល​ថា គ្មាន​អ្នកណា​ជូន ហើយ​ថា គ្រាន់​តែ​ជារូប​ទាញ​ពី Google កាត់​បិទ​ថតរូប​ជា​អនុស្សាវរីយ៍​ព្រោះ​ជាវត្ថុ​មួយ​ស្ថិត​ក្នុង​ក្តីស្រមៃ​ខ្លួន