ភ្នំពេញ៖ មកពេលនេះកូនស្រី ភិន សុដាលី រួមដំណក់ឈាម អតីតស្វាមីចុះអេតាស៊ីវិល រំលងខាន់ស្លា ប៉ែន ចំរ៉ុង នាម Katherina មានអាយុមួយខួបហើយ ក្រោយពីចំណងជីវិតអ្នកមានគុណទាំងទ្វេត្រូវផុតរលត់តាំងពីនាងក្នុងផ្ទៃវ័យបួនខែ។
ចំណងស្នេហា នាង ភិន សុដាលីស កូនស្រីសំណព្វចិត្តថៅកែផលិតកម្មមហាហង្សនិង ពិធីករក្រមិចក្រមើម ប៉ែន ចំរ៉ុង ដែលមានអាយុកាលមិនទាំងបានពីរឆ្នាំ ដែលមុននឹងផុតរលត់ជាស្ថាពរ បានផ្ទុះជម្លោះនឹងគ្នាផ្អើលអស់មហាជននិងអ្នកសិល្បៈ។ មិនខុសគ្រាផ្តើមស្នេហ៍ គូស្នេហ៍ទាំងពីរនេះក៏រួមដៃគ្នាតតាំងជម្លោះនឹង លោក អ៊ិន សុភិន ដែលប្រកាសមិនទទួលស្គាល់ប៉ែន ចំរ៉ុង ធ្វើកូនប្រសារនោះ។
ព្រមនឹងវ័យមួយខួប កូនស្រីនាង ភិន សុដាលីស រួមដំណក់ឈាម ប៉ែន ចំរ៉ុង Katherina ពីមួយថ្ងៃៗ កាន់តែស្អាត ហើយនាងក៏ក្លាយជាឳសថទិព្វបន្លប់ការនឿយហត់ របស់លោក អ៊ិន សុភិន ក្រោយសម្រាកពីការងារ ហើយក្រៅពីប្រឡែងថ្នាក់ថ្នមចៅដ៏គួរឲ្យខ្នាញ់ក៏បង្ហោះបង្អួតគេឯងនៅក្នុងបណ្តាញសង្គមទៀត។ ខណៈ ប៉ែន ចំរ៉ុង បានត្រឹមតែនៅឡេឡាខ្វាករក្រៅសង្វៀន ចង់ជួបមុខកូនស្រី ក៏ត្រូវម្តាយកូនស្រី និងគ្រួសារ បានបិទផ្លូវជិតឈឹង។
ដោយមើលឃើញកូនស្រី មានរូបសម្ផស្សទ្រលុកទ្រលន់ តាមការបង្អូតក្នុងបណ្តាញសង្គមពីអតីតឪពុកក្មេក បង្ហោះបង្អួតភ្នែកនោះ ។ ក៏ត្រូវបានគេទម្លាយថា នៅរាល់ពេលឃើញរូបកូនស្រីត្រូវបានអតីតឪពុកក្មេកបង្ហោះ ប៉ែន ចំរ៉ុង តែបើកមើលមិនរំលងឡើយ ហើយតែស្រមៃ ថាពេលណានឹងបានជួបមុខកូនផ្ទាល់ និងបានថ្នាក់ថ្នមប្រឡែងលេងកូនស្រីម្តង ឬបានត្រឹមតែស្រមៃតាមស្រមោលរូបថតកូនដ៏ស្រស់ស្អាតក្នុងបណ្តាញសង្គមទេ។
