ភ្នំពេញ៖ តារាចម្រៀងម្ចាស់ពានអភ័ព្វរស់ឆ្ងាយទ្រនំធំ ប៊ុត សីហា តែងបង្ហើរសំនៀងក្រអួនក្រអៅក្រៅហ្វូងសិល្បៈ​នោះ ក៏ទទួលបានការគាំទ្រសន្ធឺកសន្ធាប់ពីមហាជនគ្រប់មជ្ឈដ្ឋានដែរ ព្រោះតែគេមើលឃើញថា «ការច្រៀងរបស់ប៊ុត សីហា ជាសមត្ថភាពស្តែងៗ មិនមែនលំៗ​ដូចតារាមួយចំនួនទេ» ខណៈដែលបទថ្មីៗរបស់លោក «គ្មានអ្នក​ណាកែចិត្តបងបានទេ» ចេញភ្លាមមានអ្នកសម្រុកចូលទស្សនាជាង ៥លានដង។

ថ្វីត្បិត ប៊ុត សីហា ក្សត់​វោហារស័ព្ទក្តី តែលោកក៏បង្ហាញការជឿជាក់លើអបិយជំនឿមិនស្ទើរដែរ ខណៈមុនលោករងរឿងអាស្រូវ​គ្រឿងញៀនល្បីថា លោកបានទៅសំងំតាំងសិល៍លើភ្នំស្រង់ទៀតផង តែយ៉ាងណាប្រភពអ្នកភូមិថា «មិនពិតទេ គ្រាន់តែគេនិយាយក្នុងន័យលេងសើចប៉ុណ្ណោះ ព្រោះលោកគ្រានោះស្ងាត់មិនឃើញចេញមុនលើឆាកហង្សមាស»។ ប៉ុន្មានខែមុននេះតារាចម្រៀងដើមកំណើតខេត្តកំពង់ស្ពឺ ប៊ុត សីហា បានប្តូរឈ្មោះហៅក្រៅក្នុងហ្វេសប៊ុកពី The Voice Cambodia ទៅជា The Voice KH វិញ បង្កឲ្យមហាជនមានឆ្ងល់មិនស្ទើរទេ តែប្រភពខ្លះប្រាប់ថា «ដើម្បីហុងស៊ុយ»។ ជាថ្មីម្តងទៀត នៅប៉ុន្មានម៉ោងមុននេះតារាកូន១ ប៊ុត សីហា បានផ្លាស់ប្តូ​ររូប Cover ថ្មីក្នុងហ្វេសប៊ុក ដែលទំនងជាទាញយកហុងស៊ុយនាឱកាសបុណ្យ​ភ្ជុំបិណ្ឌ​ ហើយក៏ជាឱកាស​អបអរសាទរលោកទទួលបានការគាំទ្រសន្ធឹកពីសំណាក់មហាជនក្នុងបទ «គ្មានអ្នកណាកែចិត្តបងបានទេ»ផងដែរ។