ភ្នំពេញ៖ ការ​រៀប​ចំបុណ្យ​សព សាន​ ស្រីឡៃ​ មិន​ទាន​​ចប់​ផង ស្រាប់​​តែ​លេច​មុខ​អាចារ្យ​មុខ​លុយ​វត្តសែន​សុខ ដែល​តាំង​ខ្លួនឯង​ជាអាចារ្យ​ធំ មក​ទារ​លុយ​រៀប​ចំបុណ្យ​​សព សាន ស្រីឡៃ ២៦០០ដុល្លារពីក្រុម​គ្រួសារ ទាំងដឹងថា ការ​ចំណាយ​ក្នុង​ពិធីរៀប​ចំបុណ្យសពនេះ ជា​បន្ទុក​របស់​ផលិត​កម្មហង្ស​មាស​ទាំង​ស្រុង ។ អាចារ្យ​វ័យក្មេងមុខស្រស់​រូបនេះ បាន​ចេញ​វិក័យ​បត្រ​ទូទាត់​ទាំង​តក់​ក្រហល់​ថ្លៃតម្កល់​សព ១២៥០ដុល្លារ, អាចារ្យយោគី ៥០០ដុល្លារ, សម្រាប់វត្តចាត់ចែង​ពិធី​បុណ្យ ៧០០ដុល្លារ និង ក្តារ​មឈួស ១៥០ដុល្លារ  ហើយ​ថែម​ទាំង​ពោល​ពាក្យ​គំរាម​ធ្ងន់ៗថា “ប្រសិន​បើ​មិន​ឲ្យ​លុយ​ទេ សូម​យក​សព​ទៅវិ​ញ” ដែលធ្វើឲ្យមហាជនជាច្រើនបានរិះគន់ធ្ងន់ៗចំពោះ​ចំណាត់​ការ​របស់​​អាចារ្យ​រូបនេះថា ជា​មនុស្ស​ឆ្លៀត​ឱកាស​រក​លុយ មិន​​គិត​ពី​ការ​លំបាក​របស់​គ្រួសារ​សព និង​មាន​អ្នក​ខ្លះ​ទៀត​សម្តែង​ការ​ហួស​ចិត្ត​ក្នុង​ការ​ទារ​ថវិកា​ឥត​សំចៃនេះ ។

ជុំវិ​ញរឿង​នេះ មិន​ទាន់​មាន​ការ​បំភ្លឺពី​ក្រុមកា​រងារ​ហង្ស​មាស ដែល​កំពុង​តែរៀប​ចំបុណ្យសព​នោះទេ តែ​ទោះជាយ៉ាង​ណាផលិត​កម្មហង្ស​មាស មិន​ខ្វះលុយ​ទេ សម្រាប់​ពិធី​បុណ្យ​ប៉ុណ្នឹង តែ​អ្វីដែល​សំខាន់​គេ​ធ្វើ​ទៅ​តាម​ជំហាន​និ​មួយៗ និង​ចំណាយ​ត្រឹម​ត្រូវ​តាម​ខ្ទង់​របស់​គេ ៕