កណ្តាល៖ ប្រកបដោយទឹកចិត្តជ្រះថ្លា ក្នុងឱកាសកាន់បិណ្ឌទី១១ លោក ហេង ឡុង ប្រធានសមាគមមិត្តសិល្បៈ​ស្ម័គ្រ​ចិត្តជួយសង្គម និងអ្នកនាង ចន ច័ន្ទ​លក្ខិណា ប្រធាន​សមាគម​សិល្បករខ្មែរ បាននាំក្រុមការងារទៅដាក់បិណ្ឌនៅវត្តខ្ពប នាទឹកដីស្រុកអង្គស្នួល ខេត្តកណ្តាល ដែលលោក ស៊ូ វុទ្ធី និពន្ធនាយក​តារាញូស៍ បង្ហាញការយល់ឃើញថា «ពិតជាឱកាសដ៏កម្រណាស់ ពីទឹកចិត្តដ៏ជ្រះថ្លា ពីបងស្រី ចន ច័ន្ទលក្ខិណា និងស្វាមី លោក ហេង ឡុង អញ្ជើញទៅវត្ត​ខ្ពប»។

យ៉ាងណាការទៅដាក់បិណ្ឌ​ទី១១ ព្រឹកថ្ងៃទី០៥ ខែ​តុលា ឆ្នាំ២០១៨ លោក ហេង ឡុង និងភរិយាអ្នកនាង ចន ច័ន្ទលក្ខិណា បាននាំបច្ច័យ និងគ្រឿង​ឧបភោគបរិភោគចូលរួមបុណ្យដាក់បិណ្ឌ និងរំលេចការបន់ផ្សព្វឲ្យសមាគម​ទាំង ២មានការរីកចម្រើនទៅមុខ ខណៈ​ក្នុងអាណត្តិអ្នកនាង ចន ច័ន្ទលក្ខិណា ជាប្រធានសមាគមសិល្បករខ្មែរ ត្រូវបានអ្នកសិល្បៈ​តែងលើកសរសើរថា «មានសកម្មភាព​ជួយអ្នកសិល្បៈបានច្រើន» ដែលក្នុងនោះ មូលនិធិសិល្បករចាស់ជរា មានសកម្មភាពផុស​ផុលជួយទ្រទ្រង់សិល្បករ​សិល្បការិនីដែលមានភាពខ្វះ​ខាត។