​ភ្នំពេញ ៖ លោក Scott Neeson ដែល​ពលរដ្ឋ​ខ្មែរ​បាន​ស្គាល់​ថា​ជា​ស្ថាបនិក​អង្គការ​មូលនិធិ​កុមារ​កម្ពុជា (Cambodian Children’s Fund) ដែល​ត្រូវបាន​កសាងឡើង​ក្នុង​ឆ្នាំ​២០០៤ ក្នុង​គោលបំណង​កែប្រែ​អនាគត​របស់​ជីវិត​ក្មេងៗ​នៅលើ​គំនរ​សម្រាម​ស្ទឹងមានជ័យ ឲ្យ​មានឱកាស​បានទទួល​ការអប់រំ ដូច​ក្មេង​ដទៃទៀត​នោះ ស្រាប់តែ​កំឡុង​ពេលដែល​ពលរដ្ឋ​ខ្មែរ​ទូទាំងប្រទេស​កំពុង​ជួបជុំគ្នា​ដើម្បី​សម្រាក​ពិធីបុណ្យ​ភ្ជុំបិណ្ឌ​នោះ​លោក​បាន​រំលេច​ខ្លួន​លើ​ទឹកដី​សហរដ្ឋអាមេរិក​ដើម្បី​ស្វែងរក​មូលនិធិ​មក​បន្ត​ជួយ​កុមារ​កម្ពុជា​ព្រម​ដោយបាន​បង្ហាញ​រូបថត​កាន់​ទង់ជាតិ​កម្ពុជា​នៅ​ទីនោះ​ផងដែរ​។​

​បង្ហាញ​ដោយ​រូបភាព​ក្នុង​ដៃ​មាន​ទង់ជាតិ​ខ្មែរ​រំលេច​ដោយ​ពណ៌​ក្រហមឆ្អៅ​បុរស​ទទួលបាន​សញ្ជាតិ​ខ្មែរ​តាំងពី​ឆ្នាំ​២០១៥​រូបនេះ​បាន​ភ្ជាប់​ដោយសារ​គួរ​ឲ្យ​គោរព​ថា «​ក្នុងពេលដែល​អ្នក​រីក​រាយ​នឹង​បុណ្យ​ភ្ជុំបិណ្ឌ ខ្ញុំ​កំពុង​ស្ថិតនៅ​សហរដ្ឋអាមេរិក​រយៈពេល 3 សបា្ដហ៍​ដើម្បី​ស្វែងរក​មូលនិធិ​សម្រាប់ CCF (Cambodian Children’s Fund) ។ ឥឡូវនេះ​ខ្ញុំ​នៅ​ញូវយ៉ក និង​នៅ​ចំ​កណ្តាល​ហ្វូងមនុស្ស​នាទី​លាន Times ។ ដូច្នេះ​តើ​អ្នក​ទាំងអស់គ្នា​អាច​មើលឃើញ​ខ្ញុំ​ចេញពី​ហ្វូងមនុស្ស​បានទេ​? ខ្ញុំ​បានធ្វើ​រឿងនេះ​បន្តិចបន្តួច ប៉ុន្តែ​នៅ​ចំណុច​បន្តទៀត អាចជា​ការពិបាក​ជាង​នេះ​»​។​

​ខណៈ​ក្រោយ​ឃើញ​ពី​រូបភាព​ឈរ​កាន់​ទង់ជាតិ​ខ្មែរ​លើដី​អាមេរិក​ដោយ​ស្វាហាប់​បែបនេះ​ដែល​ហាក់​បង្ហាញ​ការស្រលាញ់​ស្ម័គ្រស្មោះ​ចំពោះ​កម្ពុជា​ក៏ត្រូវ​បាន​អ្នកប្រើប្រាស់​បណ្តាញ​សង្គម​ហ្វេ​ស​ប៊ុ​ក​ជាច្រើន​ធ្វើការ​កោតសរសើរ​ពី​ភាព​លះបង់​ដ៏​ធំធេង​របស់លោក ក្នុងនោះ​ម្ចាស់​គណនី​មួយ​ក៏បាន​ខ​មិន​ដោយ​ភាព​កោតក្រែង​ចំពោះ​វីរភាព Scott Neeson ថា «​ខ្ញុំ​ពិតជា​បានឃើញ​រូបភាព​របស់លោក​រួម​ដោយ​ទង់ជាតិ​របស់​ពួកយើង ខ្ញុំ​ពិតជា​ស្រលាញ់ និង​អរគុណ​ចំពោះ​គ្រប់យ៉ាង​ដែល​លោក​បានផ្តល់​មកកាន់​ពួកយើង លោក​ពិតជា​វីរបុរស​ពិតមែន ពិសេស​សម្រាប់​កុមារ​កម្ពុជា​»​។​