ភ្នំពេញ៖ ជនរងគ្រោះវ័យ ២៩ឆ្នាំ ទឿង សុផល មានរបរជាអ្នកជួស​ជុលម៉ូតូ ស្វែងរកយុត្តិធម៌នៅមូលដ្ឋានពុំបានសោះ សម្រេចរត់ទៅដាក់ពាក្យសុំអន្តរាគមន៍ពីសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ដោយបានស្នើសុំឲ្យសម្តេច ជួយរកយុត្តិធម៌ ព្រោះតែបុរសខាងលើត្រូវបានលោក ជា ឆ្លូញ អធិការស្រុកស្វាយចេក បញ្ជាឲ្យកូនចៅ ឲ្យចាប់ខ្លួនយកទៅវាយដំ ធ្វើទារុណកម្មតាមអំពើចិត្ត ដោយពុំបានសាកសួរពីអង្គហេតុដែលកើតឡើងពិតប្រាកដ។

ជនរងគ្រោះរស់នៅភូមិចម្ការគ ឃុំស្វាយចេក ស្រុកស្វាយចេក ខេត្តបន្ទាយមានជ័យ បានឲ្យដឹងពីដើមហេតុក្នុងលិខិតថា «កាលពីយប់ថ្ងៃទី០៨ ខែតុលា ឆ្នាំ២០១៨ មានករណីគ្រោះថ្នាក់ចរាចរណ៍ រថយន្តម៉ាក Chevrolet បើក​បរ​ដោយបុរសជនជាតិថៃ ក្រោមស្ថានភាពស្រវឹងស្រា ធ្លាក់ចូលស្រះទឹក រួចថយទៅបុកជន្ទុលទ្វារផ្ទះពលរដ្ឋ ជាផ្ទះបងថ្លៃជនរងគ្រោះ ដែលពេលឃើញបែបនោះជនរងគ្រោះ ដោយសារចេះភាសារថៃ បានទៅនិយាយជាមួយ តៃកុងឡានបង្ក កុំឲ្យបើកទៀត ព្រោះខ្លាចបង្កគ្រោះថ្នាក់ដល់អ្នកដទៃ។ ដោយសារតែឃាត់ជនបង្កមិនស្តាប់​ជន​រងគ្រោះ បានយកទូរស័ព្ទថតជនជាតិថៃ ជាតៃកុងរថយន្ត និងរថយន្តទុក ទើបតៃកុងរថយន្ត ខឹងដេញវាយ​ជន​រងគ្រោះ និងដណ្តើមយកទូរស័ព្ទ ហើយជនជាតិថៃក៏ដើរដួលខ្លួន​ឯង ខឹងសម្បា ហៅគ្នីគ្នា២នាក់ទៀត ដែលស្រវឹងស្រំជោគជាមដែរ មកវាយលើម្ចាស់ផ្ទះ ដែលពួកគេថយឡានបុករហូតបែកមាត់ហូរឈាម»។

ព្រោះខ្លាចមានរឿងធំជនរងគ្រោះឈ្មោះ ទឿង សុផល សុំទៅអាជ្ញាធរឲ្យជួយអន្តរាគមន៍ដែរ តែជនជាតិថៃ​បើក​ឡាន​​ដល់ផ្ទះមេភូមិមុន និងស្រែកឡូឡាឲ្យយម្ចាស់ផ្ទះ ដែលគេថយឡានបុក សងថ្លៃកំពិតក្បាលឡាន និងថ្លៃរបួស ដែលគេដើរដួលខ្លួនឯង ព្រោះស្រវឹង គិតជាទឹកប្រាក់ចំនួន ៥០០០បាត។ តែជនរងគ្រោះមិនព្រមសង ទើបនគរបាលស្រុកស្វាយចេក មកចាប់ខ្លូនដាក់ខ្នោះដៃទៅក្រោយ វាយដំ ធ្វើទារុណកម្ម តាមអំពើចិត្ត ញាត់ចូល​ឡានដឹកយកទៅអធិការដ្ឋាននគរបាលស្រុកស្វាយចេក។ ជនរងគ្រោះ ថា «ពេលទៅដល់អធិការនគរបាលស្រុកស្វាយចេក នគរបាលបានដាក់ខ្នោះជើង និងធ្វើទារុណកម្មវាយដំបន្ថែមលើរូបគេតាមអំពើចិត្ត ដោយមិនខ្លាចក្រែងអ្វីឡើយ»។