ភ្នំពេញ៖ បេក្ខនារីកម្ពុជាដែលចូលរួមប្រកួតប្រជែងក្នុងកម្មវិធីប្រលង​បវ​រ​កញ្ញា​អន្តរជាតិ ឬហៅថា Miss Grand International នឹងត្រូវបញ្ចប់ការបោះឆ្នោត​តាម​ហ្វេសប៊ុក​នាវេលា​ម៉ោង៥ល្ងាចថ្ងៃទី១៥ ខែតុលា ឆ្នាំ២០១៨នេះ ហើយ ប៉ុន្តែចំនួន Share លើរូបភាព​របស់​បេក្ខនារីបវរកញ្ញាវៀតណាម កំពុងកើនឡើងដល់ជាង៤លានហើយ ខណៈចំនួន Share លើរូបភាពរបស់បេក្ខនារីបវរកញ្ញាកម្ពុជាបានជាង៣លានប៉ុណ្ណោះ។

ខណៈការបោះឆ្នោតតាមរយៈការ Like និង Share ពីសំណាក់អ្នកប្រើប្រាស់បណ្ដាញសង្គម ត្រូវបានគេគិត ១ Like គឺទទួលបាន ១ពិន្ទុ ហើយប្រសិនបើ ១ Share ទទួលបានរហូត​ដល់​ទៅ៥ពិន្ទុ។ ទន្ទឹមនឹងឃើញ​បេក្ខនារី​ខ្មែរ ឌី លីកា កំពុងបំពេញនាទីយ៉ាងធំ​សម្រាប់​ជាតិ​លើ​ឆាក​អន្តរ​ជាតិហើយទទួលបានការ Share តិចជាង​ប្រទេ​ស​ជិ​តខាងដូច្នេះគេ​ក៏បានឃើញ​អ្នកលេង​បណ្តាញសង្គមជាច្រើនបាននាំគ្នាធ្វើការផ្សាយនូវវីដេអូ​ចែក​រំ​លែក​ពី​វីធី​សាស្រ្ត​ក្នុង​ការ​បោះ​ឆ្នោតដើម្បីបានពិន្ទុខ្ពស់យ៉ាងតក់ក្រហល់ ព្រោះនៅសល់តែប៉ុន្មានម៉ោងទៀតនឹង​បិទការ​បោះ​​ឆ្នោតហើយ ក្នុងនោះគេក៏បានឃើញគណនីតារាហ្វេសប៊ុក Ah Ry Nuon Peypey Dy និងតារាស្រី ពេជ្រ សោភា ជាដើម។