ភ្នំពេញ ៖ បណ្តាអ្នកគាំទ្រវិស័យកីឡាប្រដាល់បានចាំពីការប្រកួតដែលទើបតែបញ្ចប់ក្តៅៗ​រវាងអ្នកប្រដាល់ចិត្ត​សឿង កែវ រំចង់ និងអ្នកប្រដាល់ឆ្លងដែនថៃ Dabmorn Phumpan​muang ខណៈការប្រកួតបានបង្កើនកម្តៅ​សាច់ដុំដាក់​គ្នាធ្វើឲ្យអ្នកទស្សនាផ្ទាល់​អង្គុយ​លែង​ជាប់កៅអីស្រាប់តែទឹកទី៤ អ្នកប្រដាល់ដើមកំណើតពីខេត្ត​បាត់ដំបង កែវ រំចង់ បានដួល​សន្លប់លែងដឹងខ្លួននឹងត្រូវអាជ្ញាកណ្តាលលើកដៃបង្ហាញសញ្ញាបញ្ឈប់ការប្រកួត​ក្រោយពី កែវ រំចង់ ក៏ទទួលបានការរាប់ចំនួន២ដងមកហើយរបស់អាជ្ញាកណ្តាលលោក ធន់ សុភា ។

ប៉ុន្តែអ្វីដែលធ្វើឲ្យអ្នកស្នេហាវិស័យកីឡាប្រដាល់ «គុនខ្មែរ» មានការភ្ញាក់ផ្អើល​នោះ​​គឺក្រោយពេលអាជ្ញា​កណ្តា​ល​​សម្រេចបញ្ឈប់ កែវ រំចង់ ស្រាប់តែមានដបទឹកបរិសុទ្ធ​បានហោះឆ្លងវេហារមកកាន់សង្វៀនគួរឲ្យភ្ញាក់ផ្អើល ស្របពេលមជ្ឈដ្ឋានសន្និដ្ឋានថា​ជាការខឹងសម្បាររបស់អ្នកទស្សនាផ្ទាល់ក្រោយ​ពីមើលឃើញ​ការប្រកួត​ខុស​លក្ខខណ្ឌរបស់កីឡាករថៃ ដោយវាយកែងមួយទំហឹងចំពីក្រោយទើបបណ្តាលឲ្យ កែវ រំចង់ សន្លប់យ៉ាង​ស្អាត​បែបនេះ។ ទន្ទឹមមានការលើកឡើងពីហេតុផលមួយនេះស្រាប់តែមាន​សារព័ត៌មាន​ក្នុងស្រុក​មួយបានបង្ហើប​ឲ្យ​ដឹង​តាមរយៈវីដេអូ និងសំណេរខ្លីថា «តាមពិតដើមចម​ដែលធ្វើ​អោយអ្នកទស្សនាផ្ទាល់នៅសង្វៀនខារ៉ាបាវគប់​ដប​ទឹកទឹកសុទ្ធទៅសង្វៀនគឺដោយសារគ្រូបង្វឹក​ថៃ​ ដែល​ឡើង​អាវ៉ង់​ឌឺដង​នៅ​ពេល​អាជ្ញាកណ្ដាល​បញ្ឈប់​ការ​ប្រកួតរបស់ កែវ រំចង់» ។