ភ្នំពេញ ៖ ក្នុងឱកាសសំណេះសំណាលជាមួយកម្លាំងនគរបាលខណ្ឌ៧មករា ឧត្តមសេនីយ៍​ឯក ស ថេត ជា​អគ្គ​ស្នងការរង និងជាស្នងការនគរបាលរាជធានីភ្នំពេញថ្មីបានប្រកាសក្តែង​ៗក្នុងនាមជាស្នងការថ្មីថា« ប៉ូលិសចរា​ចរណ៍​ត្រូវតែរឹតបន្តឹងភ្លើងសញ្ញាចរាចរណ៍ ហើយ​ត្រូ​វ​កែទម្លាប់ដើរទៅចាប់ដៃយក​លុយពីរថយន្តដឹក​សំពីង​សំពោ​ង​ឲ្យ​បានជាដាច់ខាត»។ ជុំវិញ​ការប្រកាសពីបទបញ្ជាដ៏ម៉ឺងម៉ាត់នេះត្រូវបានមជ្ឈដ្ឋានលាន់មាត់​សរសើរ​លោក​ស្នងការ​ថ្មី ព្រមដោយពាក្យ «រង់ចាំមើល» ចំពោះការអនុវត្តន៍​របស់មន្រ្តីក្រោមបង្គាប់របស់​លោកផងដែរ។

ក្នុងនោះលោកស្នងការក៏បានណែនាំដល់កម្លាំងនគរបាលទាំងអស់ នៅរាជធានីភ្នំពេញ ត្រូវលុបបំបាត់​ទូហ្គេម​បាញ់ត្រី ព្រោះវាជាប្រភពបទល្មើស និងគ្រឿងញៀន ។ ចំពោះ​ការ​ចុះត្រួត​ពិនិត្យអាវុធ​ជាតិ​ផ្ទុះ និងគ្រឿងញៀន ត្រូវ ធ្វើជាប្រចាំដើម្បីទប់ស្កាត់បទល្មើស ហើយ​ពេល​ចុះ​បេសកកម្មត្រូវទន់ភ្លន់ និងជៀសវាងបង្កកំហុស ព្រោះ​នាំឲ្យខាតបង់​ថវិកាជាតិ និង​ពេល​វេលា។