កំពង់ឆ្នាំង៖​ រំពេចពីឃើញ​សោកនាដកម្ម​ដ៏ខ្លោចផ្សាររបស់គ្រួសារមួយនៅភូមិថ្មី​ ឃុំផ្សារ​ ស្រុកបរិបូណ៌​ ខេត្តកំពង់ឆ្នាំង ត្រូវ​ជនទុយ៌សរំលោភ និងសម្លាប់ ២នាក់បងប្អូន​បង្កើតយ៉ាងព្រៃ​ផ្សៃ​បំផុតនោះ សម្តេចកិត្តិព្រឹទ្ធបណ្ឌិត​ ប៊ុន​ រ៉ានី​ ហ៊ុនសែន​ ប្រធានកាកបាទក្រហមកម្ពុជា​ បានចាត់ឱ្យមន្ត្រីក្រោមឱវាទ​ចូលរួមរំលែកទុក្ខដ៏ក្រៀមក្រំ​បំផុត ព្រមទាំងបាននាំយកគ្រឿងបរិភោគ​ និងបច្ច័យ​ចំនួន​ ២០លានរៀល​ ចូលបុណ្យសពកុមារទាំងពីរនាក់បងប្អូនផងដែរ។

ថ្ងៃទី​ ១៩​ ខែតុលា​ ឆ្នាំ២០១៨​ សម្តេចកិត្តិព្រឹទ្ធបណ្ឌិត​ ប៊ុន​ រ៉ានី​ ហ៊ុនសែន​ សូមសម្តែងនូវការសោកស្តាយជាពន់ពេក​ និងសូមចូលរួមរំលែកទុក្ខដ៏ក្រៀមក្រំ​បំផុតនេះ និងសូមឧទ្ទិសបួងសួងដល់វិញ្ញាណក្ខន្ធសពកុមារី​ អ៊ុល​ លក្ខិណា​ អាយុ​ ១៤ឆ្នាំ​ និងសពកុមារី​ អ៊ុល​ ធីតា​ អាយុ​ ៧ឆ្នាំ​ បានទៅកាន់សុគតិភពកុំបីឃ្លៀងឃ្លាតឡើយ។ ជាមួយគ្នានេះ សម្ដេចកិត្តិព្រឹទ្ធបណ្ឌិត សូមអំពាវនាវដល់សមត្ថកិច្ចជំនាញវែកមុខរកឧក្រិដ្ឋជន ដើម្បីយកមកផ្ដន្ទាទោសតាមផ្លូវច្បាប់។ ជាមួយគ្នានោះ កាកបាទក្រហមកម្ពុជា​ ថ្នាក់កណ្តាល បានចូលបុណ្យសពនូវ​ អង្ករ​ ២០០គីឡូក្រាម​ ត្រីខ ៧០កំប៉ុង មី ៧កេស ទឹកក្រូច ៧កេស ទឹកបរិសុទ្ធ ៧កេស​ និងបច្ច័យចំនួន​ ២០,០០០,០០០រៀល​។