ភ្នំពេញ៖ បន្ទាប់ពីធ្វើការពិសោធន៍​ មន្ត្រីកាំកុងត្រូលរាជធានីភ្នំពេញ​បានរកឃើញថា «នៅក្នុងប្រហិតត្រីស្លាត មាន​សារធាតុគីមីហាមឃាត់បូរ៉ាក់ ចំនួន ២.៥០គីឡូក្រាម» ដែលសាធាតុនេះប្រភពមន្ត្រីជំនាញ​ធ្លាប់អះអាង​ថា «ធ្វើឲ្យប៉ះពាល់​ដល់សុខភាពអ្នកបរិភោគខ្លាំង គេ​ដាក់វាឲ្យសាច់ប្រហិតស្វិត ហើយវាគ្មានក្លិន តែមានរសជាតិប្រហាតៗបន្តិច ដែលខ្មែរយើងនិយមហៅថាទឹកអន្សា»។

ចំពោះករណី​នេះ មន្ត្រីកាំកុងត្រូលបានធ្វើការតាមនីតិវិធី ដោយដកហូតយកទៅកម្ទេចចោល និងកំពុងស្រាវជ្រាវបន្តរកប្រភពចែកចាយដើម្បី​ចាត់ការតាមផ្លូវច្បាប់។ នៅក្នុងកិច្ច​សហការគ្នាចុះត្រួតពិនិត្យគុណភាព សុវត្ថិភាពផលិតផលទំនិញ ម្ហូបអាហារ នៅផ្សារជម្ពូវ័ន កម្លាំងសមត្ថកិច្ចចម្រុះ នាព្រឹកថ្ងៃទី១៩ ខែតុលា ឆ្នាំ២០១៨​ បាន​យក​គំរូផលិតផលម្ហូបអាហារចំនួន ២០គំរូ ដូចជាផលិតផលគ្រឿងសមុទ្រ ​ប្រហិតគ្រប់ប្រភេទ ផ្អកម៉ាំ ប្រហុកជាដើម ទៅពិសោធន៍ តែរកឃើញតែប្រហិតត្រីស្លាតមួយមុខទេ​ដែលមានសារធាតុគីមី។