ភ្នំពេញ៖ អតីត​ពិធីករទូរទស្សន៍​កម្សាន្ត​ម៉ាយ​ធីវី វីជេ រតនា បានរត់ទៅសំងំសុខ​រួមប្រពន្ធលែងខ្វល់​ខ្វាយពីសិល្បៈ ដែលទំនងជាលោកចំណេញដុលនឹងអាជីវកម្ម និងជំនួញ​ជួញ​ប្រែ តែទន្ទឹមនឹងក្តីកាក់កប​កើនឡើង​ជាបន្តបន្ទាប់នោះ លោក​ត្រូវបានអ្នកជិតខាង​លួចបង្ហើបថា «ជាប្តីល្អក្នុងគ្រួសា​រចេះមើលថែប្រពន្ធសព្វគ្រប់បែបយ៉ាង» ហើយអ្វីដែលធ្វើឲ្យមហាជនចាំមិនភ្លេច​ទេគឺលោកតែសរសើរនិងលើកទឹកចិត្តប្រពន្ធសំណព្វចិត្តជានិច្ច ប្រាសចាកពីប្រុសៗមួយចំនួនតែងបន្ទោសបង្អាប់ប្រពន្ធរឿងបាក់​រូបឆោម មិនស្អាតមិនល្អដូចស្រីដទៃ។ លោក រតនា ថា «ហេតុអីត្រូវបន្ទោសបង្អាប់ប្រពន្ធមិនបានដូចកាលទើបតែស្រលាញ់គ្នា ហេតុអីត្រូវប្រៀបធៀបនាងទៅនិងស្រីខាងក្រៅ»។

អតីតតារា​ប្រុស​ដែលចាត់ទុកប្រពន្ធ​ដូចកែវភ្នែក បន្តទៀថា «គេស្អាតព្រោះគេនៅលីវ គេមិនទាន់មានអំរែកគ្រួសារដូចប្រពន្ធយើង បើគេមានអំរែកគ្រួសារដែរក៏មិនល្អជាងប្រពន្ធយើងដែរ ហេតុអីត្រូវសរសើររាងស្រីខាងក្រៅស្អាត គេមិនបានពរពោះបង្កើតកូនអោយយើងដូចប្រពន្ធយើងទេ ស្វាមីឆ្លាតមិនប្រៀបធៀបប្រពន្ធខ្លួនទៅនិងស្រីដ៏ទៃឡើយ ក្រៅពីម្តាយយើងមនុស្សស្រីដែលហ៊ានលះបង់អ្វីៗគ្រប់យ៉ាងសំរាប់យើងសូម្បីតែសម្រស់គឺមានតែប្រពន្ធយើងទេ»។