ភ្នំពេញ៖ ថ្មីៗ​នេះ ​អ្នក​គាំ​ទ្រ​កំពូល​តារា​ចម្រៀង​ស្រី​ប្រចាំ​ផលិត​កម្មហង្ស​មាស កញ្ញា ឱក សុគន្ធកញ្ញា បាន​បង្ហោះ​សារ​ទម្លាយ​ធាតុ​ពិត​របស់ សុគន្ធកញ្ញា​ឲ្យ​មហា​ជន​ជា​ច្រើន បាន​ដឹង​កាន់​តែច្បាស់​ថែម​ទៀត​នូវ​ចរិត​លក្ខណៈ​របស់​តារា​រូប​នេះ​ថា “បង​ស្រី​ ឱក សុគន្ធកញ្ញា ​ទំរាំ​​តែ​​គាត់​​ជោគជ័យ​ មក​ដល់​សព្វថ្ងៃ​ គឺ​គាត់​ត្រូវ​ជួប​ឧបសគ្គ​ជា​ច្រើន​ ហើយ​គាត់​ក៏​ជួប​រឿង​បរាជ័យ​ជា​ច្រើន​ដង​ តែ​គាត់​ខិតខំ​ប្រឹងប្រែង​តស៊ូ​ តតាំង​ជាមួយ​នឹង​ឧបសគ្គ​ទាំង​ឡាយ​​ មិន​ថា​មាន​អ្នក​​ ចង់​ប្រកួត​ប្រជែង​​ និយាយ​នេះ​ និយាយ​នោះ​ បង្កាច់បង្ខូច​ឈ្មោះ​គាត់​យ៉ាង​ណា​នោះ​ទេ​ ក៏​នៅ​តែ​មិន​អាច​ផ្ដួល​គាត់​បាន​ឡើយ​ ព្រោះ​គាត់​មាន​សមត្ថភាព​ពិត​ប្រាកដ​ បូក​រួម​ទាំង​អត្តចរិត​ល្អ​ ការ​រៀប​ចំ​ខ្លួន​ នឹង​ស្លៀកពាក់​បែប​សមរម្យ​និង​ថ្លៃ​ថ្នូរ​ ហើយ​ការ​និយាយ​ស្ដី​ចេះ​គោរព​អ្នកដទៃទៀត” ។

ការ​ហែល​ឆ្លង​កាត់​ព្យុះ​ភ្លៀង​រយ​លាន​ឧប​សគ្គ​របស់ ឱក សុគន្ធកញ្ញា បាន​ធ្វើ​កញ្ញា​ទទួល​បាន​ជោគជ័យ​ដ៏​ធំ​ធេង ដោយ​មាន​ឈ្មោះ​បោះ​សំឡេង​លើ​វិថី​សិល្បៈជា​ច្រើន​ឆ្នាំ និង​មាន​អ្នក​គាំ​ទ្រ​គ្រប់​ទិស​ទី ។ តារា​ចម្រៀង​សម្តី​ម៉ឺង​ម៉ាត់​រូប​នេះ តែង​តែ​មាន​មុខ​មាត់​ក្នុង​កម្ម​វិធី​ប្រគុំ​តន្ត្រី​ធំៗ ជា​ពិសេស​មាន​វត្តមាន​ជា​គ្រូ​បង្វឹក​ក្នុង​កម្មវិធី​លំដាប់ថ្នាក់​​ពិភព​លោក​​ជា​ច្រើន​ដូចជា The Voice Cambodia, Cambodia Idol និង The Voice Kids ជាដើម ។ ជាង​នេះ​ទៅ​ទៀត​តារា​ចម្រៀង​មាន​ចរិក​គួរ​ឲ្យគោរព​ ឱក សុគន្ធកញ្ញា តែង​​តែ​​ផ្តាំ​​ផ្ញើ​​ដល់​​ប្អូនៗ​ មិត្ត​​អ្នក​គាំទ្រ​គាត់​ទាំង​អស់​ អោយ​ខិតខំ​ប្រឹងប្រែង​រៀន​សូត្រ​ អោយ​ក្លាយ​ជា​ កូន​ល្អ​ សិស្ស​ល្អ​ មិត្ត​ល្អ​ និង​យុវជន​ល្អ​នៅ​ក្នុង​សង្គម​ជាតិទៀត​ផង​ ៕