ចាប់តាំងពីមានបញ្ហាបំណុលរហូតមានជំងឺប្រចាំកាយធ្ងន់ធ្ងរប៉ះពាល់សតិស្មារតី ក្រោយជួបទុក្ខធំម្ដាយជាទីស្រឡាញ់ទទួលមរណភាពនោះ សឿ សុធារ៉ា ដែលធ្លាប់តែជាកំពូលតារាសម្ដែងស្រីជួរមុខប្រែជីវិតធ្លាក់ស្ទើរដល់ចំណុចសូន្យ ខណៈដែលរូបសម្រស់ក៏បាក់បង់ស្ទើរតែមិននឹកស្មានដល់ ។ 
ប៉ុន្តែក្រោយសង្ងំព្យាបាលជំងឺ និងមានការជ្រោមជ្រែង ការលើកទឹកចិត្តជាច្រើនបន្តបន្ទាប់ពីសំណាក់មហាជន និងមិត្តភ័ក្ដរួមអាជីពសិល្បៈផង បានធ្វើឱ្យខ្សែជីវិតដែលធ្លាក់ហៅលែងលឺរបស់អ្នកនាង សឿ សុធារ៉ា មានឱកាសបង្ហាញមុខនៅកញ្ចក់ទូរទស្សន៍ជាថ្មី ។ ក្រៅពីងើបឈរជាថ្មីជាមួយឱកាសសម្ដែងឡើងវិញ តារាសម្ដែងល្បីល្បាញខ្លាំងជាង១០ឆ្នាំមុនរូបនេះក៏បានត្រួសត្រាយផ្លូវឱ្យកូនស្រីដើរតាមគន្លងរបស់ខ្លួន និងអតីតស្វាមីផងដែរ ។
ក្មេងស្រីដែលមានទាំងរូបសម្រស់ និងទេពកោសល្យផ្នែកសិល្បៈដែលឈ្មោះថា សាពូន តារាភិមាន ជាកូនស្រីបង្កើតរបស់អ្នកនាង សឿ សុធារ៉ា និងលោកអតីតស្វាមីលោក សាពូន មីដាដា ។ បច្ចុប្បន្ន តារាភិមាន បានកំពុងតែទទួលបានការចាប់អារម្មណ៍ពីសំណាក់មហាជន និងអ្នកដឹកនាំមួយចំនួន ខណៈកាលពីថ្មីៗកន្លងទៅនេះ ភិមាន ក៏បានបង្ហាញខ្លួននៅក្នុងខ្សែភាពយន្ដខ្នាតធំមួយរបស់ផលិតកម្មហង្សមាសជាម្ដាយផងដែរ ។
ប៉ុន្តែអ្វីដែលចាប់អារម្មណ៍ក្រោយស្ងប់ស្ងាត់មួយរយៈ សឿ សុធារ៉ា បានធ្វើឱ្យមហាជនមានការភ្ញាក់ផ្អើលយ៉ាងខ្លាំងលើរូបសម្រស់របស់អ្នកនាង ។ តាមរយៈរូបភាពប៉ុន្មានសន្លឹកនៅថ្ងៃជួបជុំអាហារសាមគ្គីគ្រួសារហង្សមាសគេសង្កេតឃើញថា ពេលនេះកំពូលតារាសម្ដែងស្រីរូបនេះកាន់តែមានភាពស្រស់ស្រាយជាងមុន ខណៈដែលរូបសម្រស់ក៏ប្រែប្រួលតាមភាពរីរាយរបស់អ្នកនាងផងដែរ ។ អ្នកប្រើប្រាស់បណ្ដាញសង្គមជាច្រើនពោលលាន់មាត់សរសើរថា បើទោះជាសក់របស់អ្នកនាង សឿ សុធារ៉ា នៅមិនទាន់ដុះវែងល្អដូចដើមយ៉ាងណាក្ដី តែរូបសម្រស់របស់អ្នកនាងកាលពីមុនបានវិលត្រឡប់មកវិញជាបណ្ដើរៗហើយ ។
សូមបញ្ជាក់ថា ចាប់តាំងពីប្រកាសឱ្យកូនស្រីច្បងដើរតាមគន្លងរបស់ខ្លួនមក អ្នកនាង សឿ សុធារ៉ា តែងតែបណ្ដើរកូនស្រីចូលរួមស្ទើរគ្រប់កម្មពិធិសិល្បៈ ។ ជាក់ស្ដែងនៅថ្ងៃអាហារសាមគ្គី ឬមពិធីជប់លៀងឆ្នាំថ្មីរបស់ហង្សមាសតារាស្រីរូបនេះក៏បានកាន់តែដៃកូនស្រីមកចូលរួមផងដែរ ៕
