បន្ទាប់ពីយំយែកដោយការរងសម្ពាធផ្លូវចិត្តធ្ងន់ធ្ងររហូរទាញកែវបោកក្បាលខ្លួនឯងមិនខ្លាចញញើតនឹងការឈឺចាប់ ពេលនេះអ្នកជំនួញអនឡាញ ឡុង ម៉ានីន ចាប់ផ្ដើមមានស្នាមញញឹមវិញហើយ ក្រោយចំណងស្នេហ៍ប្រែមកព័ណ៌ស៊ីជម្ពូដូចដើម ។ ស្ថានភាពនេះបានធ្វើឱ្យស្រីស្អាត ឡុង ម៉ានីន បោះសម្ដីឌឺដងទៅកាន់អ្នកតាមដានជីវិតរបស់នាងនាពេលថ្មីៗនេះដោយមិនរអៀសចិត្ត ។
ដោយនៅលើបណ្ដាញសង្គមរបស់អ្នកមេម៉ាយកូន១រូបនេះបានបង្ហោះវីដេអូចាស់ផ្អែមល្ហែមជាមួយសង្សារគឺកំលោះពេញនិយម ថុល សុភិទិ និងបានភ្ជាប់សំណេរយ៉ាងខ្ចីដូច្នេះថា «ខ្ញុំត្រូវគ្នាវិញហើយ ចុះអ្នកតាមដាន» ។ គេមិនដឹងថាពាក្យសម្ដីដែលស្រីស្អាត ឡុង ម៉ានីន និយាយមកនេះជាការលេងសើច ឬយ៉ាងណានោះទេ ប៉ុន្តែការទង្វើបែបនេះហាក់បីដូចជាយកទឹកចិត្តរបស់មហាជន ជាពិសេសអ្នកគាំទ្ររបស់ខ្លួនមកលេងសើច ខណៈដែលអំឡុងពេលដែលនាងជួបបញ្ហាផ្លូវចិត្តយ៉ាងធ្ងន់ធ្ងរកាលពីថ្មីៗនេះ ពួកគេជាច្រើនបានបង្ហាញក្ដីអាណិតអាសូរយ៉ាងខ្លាំង ។
បើទោះជាយ៉ាងណានៅក្នុងការបង្ហោះនោះអ្នកនាង ឡុង ម៉ានីន ក៏បានបញ្ជាក់ទៀតថា រឿងទាំងអស់មិនមែនជាការសម្តែងឡើយ នាងអត់បាយ៤ថ្ងៃហើយតែស៊ូៗធ្វើជាសប្បាយព្រោះចង់ឱ្យអ្នកគាំទ្រសប្បាយចិត្ត ។
ក្រោយបង្ហោះសារខាងលើ ស្រីស្អាតនិយមតុបតែងខ្លួនបែបស៊ិចស៊ីក៏បានបង្ហោះវីដេអូដែលសង្សារគឺលោក ថុល សុភិទិ បង្ហាញការយកចិត្តទុកដាក់ចំពោះនាងនៅក្នុងពិសេសរបស់ពួកគេ ។ បើតាមអ្វីដែលអ្នកនាង ឡុង ម៉ានីន បានបញ្ជាក់ ម្សិលមិញនេះគឺជាខួបគម្រប់១ឆ្នាំនៃចំណងស្នេហ៍របស់ពួកគេទាំងពីរ ។ អ្នកនាង ឡុង ម៉ានីន បានចាត់ទុករឿងរ៉ាវអាក្រក់ល្អកនន្លងមកបានធ្វើឱ្យពួកគេកាន់តែស្គាល់គ្នាច្បាស់ ហើយក៏សង្ឃឹមថា ទៅថ្ងៃមុខពួកគេនឹងលែងជួបបន្តទៀត ។ នាងថា «យើងបានឆ្លងកាត់រឿងល្អនឹងអាក្រក់ជាមួយគ្នាច្រើនហើយ ធ្វើឱ្យយើងកាន់តែយល់ពីគ្នាកាន់តែច្បាស់ សង្ឃឹមថាថ្ងៃទៅមុនយើងលែងជួបបញ្ហានិងជួបតែរឿងល្អៗ» ។
សូមបញ្ជាក់ថា កាលពីថ្មីៗនេះមហាជនមានការភ្ញាក់ផ្អើលយ៉ាងខ្លាំង ក្រោយស្រីស្អាត ឡុង ម៉ានីន ប្រកាសផ្ដាច់ទំនាក់ទំនងពីសង្សារបណ្ដូលចិត្តគឺតារាចម្រៀង ថុល សុភិទិ ។ ការប្រកាសបញ្ចប់ស្នេហ៍យ៉ាងតក់ក្រហល់របស់ស្រីស្អាត ម៉ានីន គឺបន្ទាប់ពីបានឃើញឃ្លីបវីដេអូមួយរបស់សង្សារឱបថើបស្រីស្អាតម្នាក់ បើទោះបីជាវីដេអូនោះគ្រាន់តែជាការសម្ដែងក្នុងបទចម្រៀងក៏ដោយ ។
ក្រោយឃើញសង្សារជាស្រីស្អាត និងជាអ្នកជំនួញអនឡាញវ័យក្មេងដ៏ល្បីល្បាញខឹងសប្បារខ្លាំងបែបនេះ បុរសរហស្សនាមកំលោះពេញនិយម ថុល សុភិទិ ក៏បានចេញសុំទោសជាសាធារណៈ និងសន្យាមិនឱ្យគូស្នេហ៍ខូចចិត្តជាលើកទី២ឡើយ ។ តាមសំណេរនៅលើបណ្ដាញសង្គមលោក ភិទិ បានឱ្យដឹងយ៉ាងដូច្នេះថា ទង្វើដែលលោកធ្វើនោះគឺដោយសារតែជាតួនាទី លើកក្រោយលោកសុខចិត្តពិបាកខ្លួនឯងក៏មិនឱ្យសង្សារខូចចិត្តជាលើកទី២ឡើយ ។
លោក ភិទិ បន្តថា ក្ដីស្រលាញ់របស់មនុស្សម្នាក់ៗមិនមែនផ្អែមល្ហែមរហូតទេ វាតែងតែមាន អាក្រក់ល្អ ស ខ្មៅ គឺត្រូវតែមាន មិនមែនតែពួកលោកទេដែលជួបបញ្ហាបែបនេះ គ្រាន់តែបញ្ហាវាកើតឡើងផ្សេងៗគ្នា ។ លោកសង្កត់ធ្ងន់ថា គ្មាននរណាដែលល្អគ្រប់ដប់ទេ អ្វីដែរលខាន់គឺទទួលស្គាល់កំហុសខ្លួនឯង រឿងនេះលោកជាអ្នកខុស លោកមិនគោរពតាមការសន្យា ទោះជាយ៉ាងណាមិនថោកអីហ្នឹងលួងមនុស្សខ្លួនឯងស្រលាញ់ទេតែវាគឺជាការផ្ដល់តម្លៃឱ្យគាត់វិញទេ ៕ 
