កំពូលតារាចម្រៀងប្រចាំផលិតកម្ម ហ្គាឡាក់ស៊ី ណាវ៉ាត្រា លោកឧកញ៉ា ព្រាប សុវត្ថិ និងកញ្ញា តន់ ចន្ទសីម៉ា បានបង្ហាញក្ដីរំភើបរីករាយយ៉ាងខ្លាំង ក្រោយមានកិត្តិយសទទួលបានគ្រឿងឥស្សរិយយសថ្នាក់ «មហាសេរីវឌ្ឍន៍» ពីព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ។
តាមរយៈសំណេរនៅលើបណ្ដាញសង្គមកាលពីម្សិលមិញ លោកឧកញ៉ា ព្រាប សុវត្ថិ បានឱ្យដឹងថា លោកឧកញ៉ាពិតជាមានកិត្តិយស និងក្ដីរំភើបយ៉ាងខ្លាំង ដែលត្រូវបានព្រះករុណាព្រះបាទសម្ដេចព្រះបរមនា នរោត្ដម សីហមុនី ប្រោសព្រះរាជទានគ្រឿងឥស្សរិយយស ព្រះរាជាណាចក្រចក្រកម្ពុជា «ថ្នាក់មហាសេរីវឌ្ឍន៍» និងត្រូវបានបំពាក់ជូនដោយផ្ទាល់ពីសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាកម្ពុជា និងលោកជំទាវ ។
លោកញ៉ាថា «ខ្ញុំបាទពិតជាមានក្ដីរំភើបចិត្តជាខ្លាំងដែលបានទទួលមហាកិត្តិយសព្រះរាជាទ្រង់ប្រោសប្រទានគ្រឿងឥស្សរិយយស ព្រះរាជាណាចក្រចក្រកម្ពុជា ថ្នាក់ «មហាសេរីវឌ្ឍន៍» ពីព្រះករុណាព្រះបាទនរោត្តមសីហមុនីព្រះមហាក្សត្រនៃព្រះរាជាណាកម្ពុជា ដោយបំពាក់ផ្ទាល់ពីសម្ដេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ។ ខ្ញុំបាទពិតជាមោទនភាពជាខ្លាំងដែលចូលរួមចំណែកក្នុងព្រឹត្តិការណ៍ប្រកួតកីឡាស៉ីហ្គេម និងអាស៊ានប៉ារ៉ាហ្គេមដែលជាព្រឹត្តិការណ៍ប្រវត្តិសាស្ត្រស្ថិតនៅក្នុងក្រអៅបេះដូងជាពលរដ្ឋខ្មែរជារៀងរហូត» ។
ដូចគ្នានេះដែរគ្រាប់ពេជ្ររបស់ផលិតកម្មហ្គាឡាក់ស៊ី ណាវ៉ាត្រា កញ្ញា តន់ ចន្ទសីម៉ា ក៏បានបង្ហាញអារម្មណ៍ថា «ក្នុងនាមនាងខ្ញុំជាសិល្បៈការិនីជំនាន់ក្រោយពិតជាមានមហាកិត្តិយស និងក្តីរំភើបឥតឧបមាដែលទទួលបានការប្រោសព្រះរាជប្រទាន គ្រឿងឥស្សរិយស ព្រះរាជាណាចក្រកម្ពុជា ថ្នាក់ «មហាសេរីវឌ្ឍន៍» ពីព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ដែលបំពាក់ដោយផ្ទាល់ពីសម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត ។ នាងខ្ញុំពិតជាមានមោទនភាពដែលបានរួមចំណែកក្នុងព្រឹត្តិការណ៍ស៊ីហ្គេម២០២៣ ដែលប្រទេសកម្ពុជាគឺជាម្ចាស់ផ្ទះ» ៕
