ដើម្បីជាការលើកទឹកចិត្តដល់សិក្សានុសិស្សដែលជាប់និទ្ទេស A នៅក្នុងសម័យប្រឡងឆ្នាំ២០២៤ នេះ ក្រុមហ៊ុនវិរៈ ប៊ុនថាំ របស់អ្នកឧកញ៉ា សួរ វីរៈ បានប្រកាសផ្ដល់ជូនការដូលើកទឹកចិត្តដល់សិក្សានុសិស្ស ដោយធ្វើដំណើរជាមួយក្រុមហ៊ុនវិរៈ ប៊ុនថាំ ឥតគិតថ្លៃ និងឥតកំណត់ទិសដៅក្នុងប្រទេសកម្ពុជា រយៈពេល ១ឆ្នាំពេញ ។
ដោយតាមរយៈការប្រកាសរបស់អ្នកឧកញ៉ា សួរ វីរៈ កាលពីពេលថ្មីៗនេះបានឱ្យដឹងថា ចំពោះក្នុងការផ្តល់ជូនខាងលើនេះ គឺសម្រាប់សិស្សនិទ្ទេស A នៅតាម២៥រាជធានី-ខេត្ត ចំនួន០៥នាក់ ដែលមានលំដាប់ពិន្ទុខ្ពស់ជាងគេ ហើយចំពោះលក្ខខណ្ឌគឺគ្រាន់តែភ្ជាប់មកនូវជាមួយសាលាកបត្រ និងលំដាប់ពិន្ទុមកជាមួយ ធ្វើដំណើរបានគ្រប់ទិសដៅក្នុងប្រទេសកម្ពុជា រយៈពេល១ឆ្នាំ និងលក្ខខណ្ឌផ្សេងៗត្រូវបានអនុវត្តន៍។
សូមគូសបញ្ជាក់ផងដែរថា ការប្រឡងបាក់ឌុប ឆ្នាំ២០២៤នេះ មានបេក្ខជនប្រឡងជាប់សរុប ១០៦ ៣៥១ នាក់ ត្រូវជា ៧៩.០០ ភាគរយនៃចំនួន បេក្ខជនមកប្រឡង។ បេក្ខជនជាប់និទ្ទេស A ចំនួន ២ ២១៦ នាក់, និទ្ទេស B ចំនួន ៩ ៧០១ នាក់, និទ្ទេស C ចំនួន ២២ ៦៧៥ នាក់, និទ្ទេស D ចំនួន ៣៦ ៦៨៣ នាក់, និងនិទ្ទេស E ចំនួន ៣៥ ០៧៦ នាក់។
សូមជម្រាបជូនថា ក្រុមហ៊ុន វិរៈ ប៊ុនថាំ អេចប្រេស គឺជាក្រុមហ៊ុនខ្មែរ ដែលឈានមុខគេតែមួយគត់ក្នុងប្រទេសកម្ពុជា សម្រាប់សេវាកម្មដឹកអ្នកដំណើរ និងសេវាកម្មបញ្ញើទំនិញ ទៅដល់គ្រប់កន្លែងទាំងអស់ មិនថាតំបន់ដាច់ស្រយាលនោះទេ ៕
