តារាចម្រៀងស្រីសំនៀងផ្អែមមុតម្ចាស់ពាននៃកម្មវិធី Cambodian Idol រដូវកាលទី២របស់ទូរទស្សន៍ហង្សមាសកញ្ញា ឈិន ម៉ានិច្ច កំពុងតែត្រូវបានអ្នកគាំទ្រចាប់អារម្មណ៍យ៉ាងខ្លាំងនៅលើបណ្ដាញសង្គម Tik Tok ក្រោយរូបថតមួយសន្លឹកក្នុងថ្ងៃចូលរួមមង្គលការ សុភក្រ្ដ កុសុម៉ា ។
ពិតណាស់មង្គលការរបស់ពិធីការិនីសម្បុរស្រអែមញញឹមស្រស់ សុភ័ក្រ្ដ កុសុម៉ា និងលោក កែវ ផុនផល្លា បានបញ្ចប់ទៅដោយរលូនក្រោមការសាទរយ៉ាងច្រើនពីសំណាក់មិត្តភ័ក្ដអ្នកស្គាល់ សិល្បករ និងថ្នាក់ដឹកនាំក៏បានផ្ដល់កិត្តិយសចូលរួមផងដែរ ។ ប៉ុន្តែអ្វីដែលអ្នកលេងបណ្ដាញសង្គម Tik Tok ចាប់អារម្មណ៍បន្ទាប់ពីមង្គលការដ៏អធិកអធមនេះ គឺតារាចម្រៀងសំនៀងផ្អែមពីរោះរបស់ហង្សមាសកញ្ញា ឈិន ម៉ានិច្ច បានទម្លាយនូវរូបថតមួយសន្លឹកក្នុងថ្ងៃមង្គលការ សុភ័ក្ដ្រ កុសុម៉ា ដែលថតរួមគ្នាជាមួយនឹងកូនក្រមុំ និងបុរសសង្ហាម្នាក់ ដែលអ្នកគាំទ្រកំពុងតែសង្ស័យថា អ្នកទាំងពីរអាចនឹងកំពុងមានទំនាក់ទំនងពិសេស ។
ការដាក់មន្ទិលសង្ស័យពីសំណាក់អ្នកគាំទ្របែបនេះ គឺបន្ទាប់ពីបានឃើញអ្នកទាំងពីរស្និតស្នាល និងកាន់ដៃគ្នាដូចជាគូស្នេហ៍ ។ យ៉ាងណាបើទោះជាមានអ្នកបញ្ចេញមតិសួរនាំជាច្រើនអំពីរូបភាពដ៏គួរឱ្យចាប់អារម្មណ៍នេះក្ដី ប៉ុន្តែម្ចាស់បទ «កូនកំលោះអូនគ្រាន់តែជាមនុស្សធម្មតា» រូបនេះមិនបានបកស្រាយដើម្បីឱ្យចម្ងល់នោះទេ ដោយកញ្ញាគ្រាន់តែដាក់រូប Sticker ឆ្លើយតបតែប៉ុណ្ណោះ ។
សូមបញ្ជាក់ថា កញ្ញា ឈិន ម៉ានិច្ច គឺជាម្ចាស់ពាននៃកម្មវិធី Cambodian Idol រដូវកាលទី២បន្ទាប់ពីលោក នី រតនា ដែលបច្ចុប្បន្នបានបង្កើតគ្រួសារដ៏មានសុភមង្គល ក្រោយបានរៀបការជាមួយកូនស្រីអ្នកជំនួញអ្នកនាង ហេង សុវណ្ណភ័ក្រណា កាលពីដើមឆ្នាំ២០១៩ ។
យ៉ាងណាបើទោះបីជាលោក នី រតនា ម្ចាស់ពាន Cambodian idol រដូវកាលទី១បានរៀបការជាច្រើនឆ្នាំ និងមានកូន៣នាក់ហើយក្ដី ប៉ុន្តែម្ចាស់ពានរដូវកាលទី២ដែលកន្លងមកតែងតែចេញបទចម្រៀងត្រដំត្រសងជាមួយគ្នារហូតមកនោះ នៅមិនទាន់បង្ហាញមុខគូស្នេហ៍ជាផ្លូវការដូចតារាចម្រៀងមួយចំនួនឡើយ តែក្រោយទម្លាយរូបថតមួយសន្លឹកក្នុងមង្គលការរបស់ សុភ័ក្ដ កុសុម៉ា កាលពីថ្មីៗនេះ អ្នកគាំទ្ររំពឹងថា ម៉ានិច្ច អាចនឹងបង្ហាញបុរសជាគូជីវិតក្នុងពេលឆាប់ៗនេះដែរ ៕