បន្ទាប់ពីរឿងរ៉ាវបានស្ងប់ស្ងាត់អតីតបវរកញ្ញាភពផែនដីកម្ពុជាកញ្ញា ដេត ស្រីនាថ ស្រាប់តែចេញមកប្រកាសដំណឹងដ៏ភ្ញាក់ផ្អើលម្ដងទៀត ដោយបង្ហាញពីគោលបំណងចង់ចូលរួមប្រកួតវិស័យបរវកញ្ញាជាថ្មីក្នុងឆ្នាំ២០២៥នេះ និងស្នើឱ្យមហាជនផ្តល់ឱកាសឱ្យនាងម្ដងទៀត ដើម្បីបានបង្ហាញសមត្ថភាពនូវអ្វីដែលមាន ។
គេនៅចាំបានថា កាលពីទី២៧ ខែវិច្ឆិកា ឆ្នាំ២០២៤ កន្លងទៅថ្មីៗនេះ កញ្ញា ដេត ស្រីនាថ ធ្លាប់បានធ្វើឱ្យប្រជាជនខ្មែរទូទាំងប្រទេសអស់ជំនឿចិត្ត ទៅលើរូបនាងយ៉ាងខ្លាំង បន្ទាប់នាងប្រកាសធ្វើពហិការព្រមចូលរួមប្រកួត វគ្គផ្ដាច់ព្រ័ត្រនៃការប្រកួតបវរកញ្ញាភពផែនដីអន្តរជាតិដែលរៀបចំឡើងនៅប្រទេសកម្ពុជា ដែលមានបវរកញ្ញាជាង៧០ប្រទេសចូលរួមប្រកួត ។
យ៉ាងណាក្រោយរឿងរ៉ាវខាងលើក៏ហាក់ស្ងាតមួយរយៈស្រាប់តែថ្មីៗនេះកញ្ញា ដេត ស្រីនាឌ ចេញមកបង្ហាញពីបំណងចង់ចូលរួមប្រកួតវិស័យបរវកញ្ញា ម្តងទៀតនៅក្នុងឆ្នាំ ២០២៥នេះម្តងទៀត និងសូមការអនុគ្រោះពីមហាជនចំពោះ បញ្ហាដែលបានកើតឡើងកន្លងមក ។
ដោយ ដេត ស្រីនាឌ បាននិយាយថា «ជំរាបសួរ លោកអ៊ុំពូ មីង លោកតាលោកយាយនិង ពុកម៉ែបងប្អូនទាំងអស់គ្នាជាទីស្រឡាញ់ នាងខ្ញុំមិនអាចដូរការគិតរបស់បងប្អូនចំពោះនាងខ្ញុំក្នុងបញ្ហាដែលបានកើតឡើងកន្លងមក ហើយនាងខ្ញុំមិនអាចបកស្រាយអោយអស់សេចក្តីនូវគ្រប់ករណីទេ តែរូបនាងខ្ញុំបានសម្រេចចិត្តថា ឆ្នាំថ្មី ឆ្នាំ 2025 នាងខ្ញុំនឹងជ្រើសរើសការបង្ហាញឆន្ទៈរបស់ខ្ញុំចំពោះវិស័យបវរកញ្ញា ក្នុង កម្មវិធី Miss ណាមួយដើម្បីចូលប្រកួត ហើយខិតខំបញ្ចេញអោយអស់ពីសមត្ថភាពនូវអ្វីដែលនាងខ្ញុំមាន និង សូមពុកម៉ែបងប្អូនផ្តល់ឱកាសអោយនាងខ្ញុំបានបង្ហាញនូវឆន្ទៈ និងគោលដៅរបស់នាងខ្ញុំដោយការអនុគ្រោះ ខ្ញុំដួលកន្លែងណាខ្ញុំនឹងខំប្រឹងក្រោកឈរនៅកន្លែងនោះ» ។
ការឱកាសជាលើកទី៣របស់ ដេត ស្រីនាឌ នៅតែមានមតិមួយចំនួនបង្ហាញការគាំទ្រ ទោះនាងធ្លាប់បោះបង់ការប្រកួតម្ដងជាពីរហើយក្ដី ។ ប៉ុន្តែក៏មានមតិជាច្រើនហាក់អស់ជំនឿចិត្តទៅលើអតីតបវរកញ្ញាភពផែនដីកម្ពុជា ព្រោះអ្វីដែលនាងបានធ្វើកន្លងមកគឺជាការ បំបាក់មុខមាត់ប្រទេសកម្ពុជាលើឆាកអន្តរជាតិ ខ្លះទៀតក៏លើកឡើងងថា មិនចង់ឃើញ ស្រីនាង ចូលប្រកួតកម្មវិធី បរវកញ្ញានេះទៀត ព្រោះខ្លាចអតីតបវរកញ្ញាភពផែនដីរូបនេះដើរតាមគន្លងចាស់ម្ដងទៀត ។
បើទោះយ៉ាងណាគេមិនទាន់ដឹងថា ស្រីនាថ នឹងបង្ហាញខ្លួនក្នុងកម្មពិធីណានោះឡើយ ប៉ុន្តែបើតាមការអះអាងរបស់អតីតម្ចាស់បវរកញ្ញាភពផែនដីកម្ពុជាឆ្នាំ២០២៤ បានឱ្យដឹងថា ខ្លួននឹងចូលរួមប្រកួតម្ដងទៀតនៅឆ្នាំ២០២៥នេះ ៕