ទើបផ្ទេរតំណែងជាងមួយសប្ដាហ៍! ពេលនេះលេចមុខ ល្អហួស ជាបេក្ខភាពកម្មពិធីប្រកួតសម្រស់ដ៏ធំមួយទៀត

យុវតី ល្អ ហួស ត្រៀមនឹងចូលរួមការប្រកួតប្រជែងកម្មវិធីប្រឡងសម្រស់ Miss Teen Cambodia 2025 នាពេលខាងមុខនេះ ស្របទៅនឹងទិសដៅដែលនាងគ្រោងទុក ក្នុងដំណើរឆ្ពោះទៅកាន់ការប្រកួតកញ្ញាឯកចក្រវាទ្បនាពេលអនាគត ។

ពិតណាស់ ល្អហួស តែងបង្ហើបតម្រុយជារឿយៗអំពីការចូលប្រកួតជាថ្មីម្ដងទៀត បន្ទាប់ពីកញ្ញាបានទទួលជយលាភី និងបានក្លាយជាម្ចាស់មកុដ Miss Preteen Junior Idol World 2024 រហូតធ្វើឱ្យមហាជនក៏ដូចជាអ្នកគាំទ្ររបស់កញ្ញាបន្តតាមដាន និងពិតជាចង់ដឹងថាស្រីស្រស់រូបនេះសម្រេចចិត្តចូលប្រកួតក្នុងកម្មវិធីក្នុងស្រុកណាមួយបន្តទៀត ។

យ៉ាងណាមិញ ក្រោយការផ្ទេរមកុដទៅឱ្យម្ចាស់ជយលាភីថ្មីក្នុងកម្មវិធី Miss Preteen Cambodia 2024 ដែលទើបបញ្ចប់នាពេលថ្មីៗជាង១សប្ដាហ៍កន្លងទៅ ពេលនេះកូនស្រីរបស់អតីតតារាសម្ដែងអ្នកនាង ដេននី ក្វាន់ ក៏បានលេចមុខជាបេក្ខភាពកម្មពិធីប្រកួតសម្រស់មួយផ្សេងទៀត គឺ Miss Teen Cambodia 2025 ធ្វើឱ្យមហាជនមានការភ្ញាក់ផ្អើល ។

ក្រោយត្រូវបានផេកផ្លូវការរបស់កម្មពិធីខាងលើប្រកាសជាសាធារណៈ យុវតី ល្អ ហួស ក៏បានបង្ហោះសារឱ្យដឹងផងដែរថា ការដែលនាងមកប្រកួតលើកនេះគឺនាងមកយកបទពិសោធន៍ថ្មីៗបន្ថែមទៀត ដើម្បីឈានចូលដល់កម្មវិធីធំៗ នៅថ្ងៃខាងមុខនេះ ។

ដោយយុវតី ជូរី ល្អហួស បាននិយាយថា «ការដែលនាងខ្ញុំមកប្រកួតលើកនេះគឺនាងខ្ញុំមកយកបទពិសោធន៍ថ្មីៗបន្ថែមទៀត ដើម្បីនាងខ្ញុំឈានចូលដល់កម្មវិធីធំៗ នៅថ្ងៃខាងមុខនេះ កម្មវិធីនីមួយៗគឺសុក្រឹតណាស់ អ្នកណាមានសមត្ថភាពខ្លាំង អ្នកនោះគឺជាឈ្នះ មិនមែនជាការចង្អុលឬការចាប់ដាក់នោះទេ នាងខ្ញុំយកសមត្ថភាពទៅប្រកួត និងបទពិសោធន៍របស់នាងខ្ញុំជាច្រើន រួមទាំងការលើកទឹកចិត្តពីក្រុមគ្រួសារ ពុកម៉ែបងប្អូនប្រជាជនកម្ពុជា និងFan Fan ជាច្រើន នាងខ្ញុំមានសិទ្ធគ្រប់គ្រាន់ក្នុងការជ្រើសរើសកម្មវិធីដែលនាងខ្ញុំស្រលាញ់ ចង់ចូលរួមប្រកួត ហើយក៏មិនមែនជាការរៀបចំទុកមុនដែរ ។

ការប្រកាសខាងលើនេះ បានធ្វើឱ្យមហាជនជាច្រើនសម្តែងការអបអរ និងគាំទ្រ ខណ:មហាជនរំពឹងថា យុវតី ល្អ ហួស នឹងអាចដណ្តើមមកុដក្នុងកម្មវិធី ព្រោះមកលើកនេះ ជូរី ល្អហួស ក៏បានបង្ហាញការតាំងចិត្តយ៉ាងមុតមាំរបស់ខ្លួនក្នុងការនាំយកសមត្ថភាព និងបទពិសោធន៍ដែលមានកន្លងមកទៅចូលរួមក្នុងកម្មវិធីប្រកួតមួយនេះ និងធានាថាឆ្នាំនេះប្រាកដជាប្លែកជាងឆ្នាំរាល់ដងជាក់ជាមិនខាន ៕