ទីបំផុត MV ចម្រៀងថ្មីរបស់កំពូលតារាចម្រៀង ខេមរៈ សិរីមន្ត ដែលច្រៀង Fit ជាមួយស្តេចភ្លេងល្បីឈ្មោះ TEMPO Tris តៀមចេញជាផ្លូវការឆាប់ៗនេះបន្ទាប់ពីចំណាយពេលវេលាផលិតយ៉ាងសម្រិតសម្រាំងអស់ពេលយ៉ាងយូរ ដោយបទចម្រៀងមួយបទនេះមានចំណងជើងថា « Khmer Vibe » ជាចង្វាក់ថ្មីសាងប្រវត្តិសាស្រ្តថ្មីក្នុងវិថីចម្រៀងនៅកម្ពុជា ។
ការច្រៀង Fit រួមគ្នារវាងកំពូលតារាចម្រៀង ខេមរៈ សិរីមន្ត រួមជាមួយតារាចម្រៀងរ៉េប និងជាអ្នកនិពន្ធបទភ្លេង TEMPO Tris នៅក្នុងបទចម្រៀងនេះពិតជាអស្ចារ្យ និងមានចំណុចពិសេសជាច្រើនដែលគួរឱ្យចាប់អារម្មណ៍ ។
MV ចម្រៀង Khmer Vibe មានចេញនៅក្នុងផលិតកម្ម ហ្គាឡាក់ស៊ី ណាវ៉ាត្រា ដោយក្នុងបទចម្រៀងនេះគឺចង់បង្ហាញពីការច្រៀង Fit រួមគ្នាជាលើកដំបូងរវាង កំពូលតារាចម្រៀង ខេមរៈ សិរីមន្ត និងលោក TEMPO Tris ដែលជាអ្នកភ្លេងនិងជាតារាចម្រៀងល្បីឈ្មោះមួយរូបក្នុងវិស័យផលិតចម្រៀង Original Song ។
ការប៉ះគ្នាជាលើកដំបូងរវាងលោក ខេមរៈ សិរីមន្ត និង TEMPO Tris ក្នុងសង្វៀនចម្រៀងគឺដើម្បីសាងប្រវត្តិសាស្រ្តថ្មី ដោយបទចម្រៀងនេះជាចង្វាក់ថ្មី ជាខ្មែរពិតៗ និងបានបញ្ចូលនូវឧបករណ៍សម័យ និងភ្លេងបុរាណរួមបញ្ចូលគ្នា បង្កើតបានជាបទចម្រៀងថ្មី ប្លែក និងគួរឱ្យចាប់អារម្មណ៍ ។ មិនតែប៉ុណ្ណោះក្នុងបទចម្រៀងនេះ គឺជាបទចម្រៀងរ៉េប លាយ Hip Hop ខ្មែរដំបូងគេដែលគ្មានពាក្យអសុរសដាក់បញ្ចូលឡើយ ។ អ្វីដែលកាន់តែពិសេសជាងនេះទៅទៀតគឺក្នុង MV ចម្រៀង « Khmer Vibe » ប្រជុំទៅដោយការសម្តែងរបស់សិល្បករសិល្បការិនីក្មេងៗជាច្រើន ធ្វើឱ្យបទចម្រៀងមួយបទនេះមើលទៅកាន់តែត្រជាក់ភ្នែក ។
ទាំងស្ទាយនៃការស្លៀកពាក់ និងការតុបតែងខ្លួនរបស់តារាចម្រៀង ខេរមៈ សិរីមន្ត និងលោក TEMPO Tris រួមជាមួយសិល្បករដែលសម្តែងអមពីក្រោយ មើលទៅពិតជាស្រស់ស្អាត សប្បាយៗ និងគួរឱ្យចាប់អារម្មណ៍ណាស់។
សូមរង់ចាំទស្សនា MV ចម្រៀងក្នុងសប្តាហ៍នេះរបស់កំពូលតារាចម្រៀង ខេមរៈ សិរីមន្ត និងលោក TEMPO Tris ច្រៀង Fit រួមគ្នាជាលើកដំបូង បង្កើតប្រវត្តិសាស្រ្តថ្មីក្នុងវិថីចម្រៀងទាំងអស់គ្នានៅក្នុងផលិតកម្ម ហ្គាឡាក់ស៊ី ណាវ៉ាត្រា៕ 
